Kreu i Komunitetit Ortodoks të Vlorës, At Konstandin Prifti ka treguar momentet e ngjarjes së rëndë të përfshirjes nga flakët ku udhëtonin 30 besimtarët ortodoksë.
Në një intervistë për gazetën “Shekulli”, ai rrëfen momentet e tmerrit, çastet e para të përfshirjes nga flakët dhe veprimin heroik të një banori të Krujës, që theu xhamin e autobusit me sëpatë.
“Dikush, një banor i zonës që dëgjoi të bërtiturat dhe ulërimat u afrua me shpejtësi me një sëpatë. Sikur e dërgoi Zoti. Ai theu njërin prej xhamave të autobusit në fund, që ishte mundësia e vetme për të shpëtuar njerëzit. Ai bëri një mrekulli, bëri një veprim heroik. Në të kundërt, unë e them me bindje se vetëm 6 persona do të kishin shpëtuar. Do të ishte një tragjedi me përmasa tepër të rënda. U përfshiva edhe vetë për të nxjerrë njerëzit nga autobusi”, shprehet At Konstandin Prifti.
Ai ka treguar gjithashtu se bashkë me të udhëtonin edhe djali i tij me nusen dhe vajza e tij. Kjo e fundit ndodhet në spital ku dhe po merr trajtim mjekësor. Sipas At Konstandin Prifti që ishte ulur pas shoferit të autobusit, zjarri nisi në pjesën e përparme dhe tymi filloi të dilte nga kondicioneri. Pas disa sekondash shpërtheu edhe zjarri.
