Djegia e një autobusi me qytetarë nga Vlora në Krujë ditën e djeshme ka tronditur mbarë vendin. Një grua mbeti e vdekur por 29 persona arritën të shpëtonin.
Ngjarja mund të kishte përmasa edhe më të mëdha, por falë ndërhyrjes së shpejtë të qytetarëve krutanë u shmang një tragjedi më e madhe. Por cilët janë heronjtë e Krujës, që shpëtuan qytetarët nga Vlora. I pari është Met Bakiu, pronari i një rrobaqepësie, i cili mori një sëpatë dhe arriti të thyente xhamat e autobusit duke nxjerrë udhëtarët jashtë në kohë.
Meti madje ka marrë djegie në dorën e majtë të tij, por nuk rreshti së ndihmuari qytetarët në vështirësi. Gjithashtu, i menjëhershëm ka qenë reagimi i skuadrës së zjarrfikësve me në krye Altin Shullazin, si edhe i personave të tjerë që dërguan në spital të lënduarit, si Gëzim Lushi, Skerd Prushi, Eri Pajtoni, Ylber Llubani, Çim Bakiu, Edi Sufa, Tan Berhami, Arbër Bera etj.
