Drejtori i Zyrës së Shtypit dhe i Komunikimit në Partinë Demokratike, Alfred Lela ka treguar se ku ndodhet sot kreu i PD, Sali Berisha, një ditë pasi 31-vjeçari Gert Shehu e qëlloi me grusht në fytyrë në nisje të protestës së opozitës.
Gjatë një interviste për Euronews Albania, Lela u shpreh se sot Sali Berisha ndodhet në shtëpi pranë familjarëve të tij.
Ai tha se sot nuk do të ketë asnjë reagim nga Berisha për ngjarjen e djeshme brutale, pasi gjithçka e tha dje në një konferencë shtypi mbi 20 minuta.
“Zoti Berisha ka marrë me dhjetëra mesazhe nga miq të tij të huaj. Ambasada amerikane, britanike kanë reaguar. Berisha një ditë pas goditjes brutale ndodhet nën ngrohtësinë e familjes, ku do të ndodhej gjithsecili prej nesh. Mos prisni sot reagim nga Berisha. Berisha e bëri dje reagimin si burrë në një mënyrë epike, pavarësisht sulmit ai qetësoi gjakrat, rezistoi si burrat dha një konferencë shtypi mbi 30 minuta”, u shpreh Lela.
