Vetëm një javë pas rinovimit të kontratës, Mauro Ikardi bëhet përsëri temë dite tek Interi. Por kësaj here çështja është tepër serioze, aq sa klubi zikaltër pritet t’ia heqë shiritin e kapitenit sulmuesit argjentinas.
Shkak është bërë një përplasje me tifogrupin ultras lidhur me një prapaskenë që lojtari zbulon në librin e tij autobiografik të publikuar së fundmi. Bëhet fjalë për episodin e 1 shkurtit 2015, pas përfundimit të ndeshjes së humbur nga zikaltrit 3-1 në fushën e Sasuolos.
Tifozëve nuk u ka pëlqyer rrëfimi i ngjarjeve nga bomberi argjentinas, i cili, sipas tyre, shtrembëron të vërtetën. Ata shprehën indinjatë ndaj futbollistit përmes një letre publike, e cila u shoqërua nga një e ngjashme nga ana e 23-vjeçarit pak orë më pas. Në të Ikardi përpiqej të qartësonte situatën dhe të rikthente qetësinë para ndeshjes me Kaljarin.
Megjithatë paqja jo vetëm që nuk u arrit, por sot në “San Siro” kapiteni internist u prit me fishkëllima dhe banderola fyese nga tribuna e ultrasve.
“Ikardi, bastardi je ti që shpik gomarllëqe për të shitur më shumë. Mercenar i babëzitur”; “Përdor një fëmijë për t’u justifikuar dhe hedhur baltë. Nuk je burrë, nuk je kapiten, je thjesht një frikacak i fëlliqur”; 100 gola dhe 100 trofe nuk mund ta fshijnë m… që je” ishin disa nga banderolat kundër sulmuesit, ndërkohë që pjesa tjetër e tifozëve u rreshtuan përkrah Ikardit duke e duartrokitur.
Kjo situatë ndikoi për keq te lojtari, i cili gjuajti jashtë nga pika e penalltisë në minutën e 26-të të ndeshjes së humbur 2-1, duke shpërdoruar mundësinë për ta kaluar ekipin e tij në avantazh e për t’i dhënë takimit një tjetër rrjedhë.
Pas ndeshjes, në drejtim të kapitenit erdhën kritika të ashpra edhe nga zëvendëspresidenti i Interit, Havier Zaneti, dhe drejtori teknik Piero Auzilio. “Do të merren masa. Për ne tifozët janë gjëja më e rëndësishme dhe duhen respektuar. A do t’ia heqim shiritin? Pas ndeshjes do të diskutojmë e do të vendosim çfarë do të bëjmë”, deklaroi Zaneti.
Kurse Auzilio bëri këto komente: “Mendimi i Havierit përfaqëson atë të të gjithë shoqërisë. E kemi shtyrë vendimin për të hënën, pasi duhej të mendonim për këtë ndeshje shumë të rëndësishme që kishim sot. Do të flasim me Ikardin dhe do të kemi tërë kohën e nevojshme për të vendosur. Pjesa tjetër e tifozëve nuk e fishkëllyen? Sot ishte një klimë shumë e çuditshme, por në pjesën e parë pashë një Inter të mirë. Duhej të konkretizonim mundësitë që krijuam”.
E sikur të mos mjaftonin këto, Mauro ishte pre e një grupi prej rreth 40 ultrasish të cilët e sulmuan automjetin e lojtarit teksa i afrohej banesës së tij pas ndeshjes me Kaljarin. Ata kishin vendosur përballë shtëpisë së lojtarit një banderolë ku shkruhej me ironi: “Neve këtu na ke, kur vijnë ata miqtë e tu argjentinas?”. U desh ndërhyrja e rojave për të larguar agresorët.
