Nga Arlind CARA
“Zemra e një kombi!”, “Energji e pashtershme!”, “Motori i një shoqërie!”, “E ardhmja jonë e ndritur!” këto janë një sërë togfjalëshësh rutinë që janë bërë aq të vjetër për të përkufizuar rininë. Sa herë i dëgjoj, sidomos nga gojët e politikanëve këto shprehje, mua si të ri, me mplakin. A përcjellin vërtetësi këto përcaktime në realitetin shqiptar ? Duke parë rrethanat jo favorizuese për grupin më gjigant të interesit në vendin tonë, përgjigjja është e thjeshtë: Jo ! Më poshtë do rreshtoj disa pyetje që mbase jo të gjithë të rinjtë shqiptarë u japin dot përgjigje, por pasojat e të cilave i vuajnë çdo ditë nga papërgjegjshmëria e politikave afatshkurtëra, të çoroditura dhe kuturu që vijojnë prej 25-vitesh si nga qeverisjet e “djathta” edhe nga ato te “majta”!
A e dinë të rinjtë shqiptarë që ata janë të vetmit në Europë që nuk kanë një kartë studenti ?
A e dinë të rinjtë shqiptarë që janë të vetmit në Europë që nuk kanë asnjë perfitim nga lehtësirat ekonomike që kanë në lidhje me aksesin në transport publik, në kinema, në muze, apo në mjedise të tjera kulturore siç kane bashkëmoshatarët e tyre në vendet e tjera në kontinent ?
A e dinë të rinjtë shqiptarë që aktualisht në shumë universitete prestigjoze në Europë ekzistojnë mijëra programe studimi që janë shumë më të lira se sa programet e studimit në Shqipëri ?
A e dinë të rinjtë shqiptarë se aktualisht tarifat e studimit që paguajnë ata janë ndër më të shtrejntat në Europë, për te mos thënë më të shtrejntat, parë kjo në përpjestim me të ardhurat e tyre dhe me nivelin e jetesës që ka aktualisht Shqipëria ?
A e dinë të rinjtë shqiptarë që Universitetet shqiptare kanë numrin më të ulët në të gjithë kontinentin përsa i përket marrëveshjeve të bashkëpunimit dhe të shkëmbimeve të studentëve me Universitetet Europiane?
Madje a e dinë të rinjtë shqiptarë se ka shtete të botës së tretë si në Azi ose në Afrikë apo vende që janë në konflikt ose luftra civile, që kanë më shumë programe bashkëpunimi dhe shkëmbejnë studentë më shumë me Universitete Europiane se sa Shqipëria, që është gjeografikisht në Europë ?
A e dinë të rinjtë shqiptarë që Shqipëria ka numrin më të ulët të bibliotekave funksionale për banor në të gjithë Europën ?
A e dinë të rinjtë shqiptarë që aktualisht Këshillat Studentorë në vendit tonë janë organizmat rinore universitare më jo funksionale në të gjithë Europën ? A e dinë që me ligjin e fundit të arsimit të lartë këto Këshilla janë shndërruar në manekinë në duart e agjensive shtetërore dhe e kanë humbur çdo parametër te lirise akademike ?
A e dinë të rinjtë shqiptarë që aktualisht Shqipëria ka nivelin më të ulët të hapësirave publike të kualifikuara rekreative dhe sportive në të gjithë kontinentin Europian ?
A e dinë të rinjtë që aktualisht rinia shqiptare duhet të shpenzojë para me shumë se kush do tjetër në të gjithë kontinentin e vjetër për të udhëtuar nga një vend në tjetrin ?
A e dinë të rinjtë shqiptarë që me qindra e mijëra bashkëmoshatarë që jetojnë në errësirë (pa energji elektrike) si në asnjë vend normal të Europës për shkak të politikave absurde për te mos mbështetur personat me probleme të theksuara ekonomike ?
A e dinë të rinjtë shqiptarë se aktualisht ajo vijon të mbetet rinia me e kufizuar kulturalisht, ekonomikisht dhe polikisht në të gjithë Europën ?
