Partia Demokratike feston sot 24-vjetorin e fitores së saj në zgjedhjet e 22 marsit të vitit 1992.
24 vjet më parë votuesit shqiptarë do të paraqiteshin përpara kutive të votimit për të përcaktuar të ardhmen e tyre politike. Fitorja 67 përqind e opozitës demokratike në këtë proçes zgjedhor do të ishte gjithëkombëtare nisur nga dëshira e përbashkët e shumicës së shqiptarëve për të ndryshuar sistemin.
Për kryetarin e Partisë Demokratike, Lulzim Basha, 24 vjet më parë, me votë të lirë shqiptarët zgjodhën të ardhmen, shpresën dhe Partinë Demokratike.
Në një postim në rrejtin social “Facebok”, Basha thekson se në këtë 22 Mars çdo demokrat dhe jo vetëm është krenar për arritjet që vendi ka shënuar nën drejtimin e Partisë Demokratike.
“Rrëzimi i sistemit komunist dhe vendosja e pluralizmit në vend, ekonomia e tregut, liria për të besuar, menduar dhe shprehur, e drejta për tu arsimuar, infrastruktura, Shqipëria në NATO, lëvizja e lirë, dhe rekomandimi për statusin kandidat në Bashkimin Europian janë vepra të qeverisjes së Partisë Demokratike”, shprehet kreu i opozitës.
Sot më shumë se asnjëherë më parë në këto 24 vjet, vë në dukje Basha, kjo ditë frymëzon çdo shqiptar për të luftuar në mbrojtje të votës, në garantimin e zgjedhjeve të lira dhe të ndershme.
“Me votë ne do t’i çlirojmë qytetarët nga regjimi i varfërisë dhe i mjerimit, nga regjimi i dhunës dhe kërbaçit, nga regjimi i padrejtësisë dhe i mashtrimit, nga regjimi ku ligjin e bën krimineli dhe i riu apo e reja e sapodiplomuar, profesionisti i ndershëm apo intelektuali i guximshëm endet i papunë”, deklaron kreu i selisë blu.
Me votë, me zgjedhje të lira dhe të ndershme, ashtu si me 22 mars, shprehet Basha, shqiptarët do të hapin një rrugë të re shprese dhe zhvillimi për Shqipërinë.
