Mbahet nga sot deri më datë 17 qershor samiti i radhës i G7-ës, në Kananaskis, Alberta, Kanada.
Fillimisht, ishte e planifikuar që diskutimet e këtij samiti të kryesoheshin nga lufta në Ukrainë, e se si Rusia duhet të “ndëshkohet” përmes disa masave shtrënguese. Mësohet se shpejt axhenda ndryshoi, pasi diskutimet do kryesohen rreth temës Izrael-Iran.
Vendimi i Izraelit për të sulmuar Iranin do të detyrojë G7 të shpenzojë më pak kohë për çështje të tjera dhe në vend të kësaj të diskutojnë mënyrat e menaxhimit të konfliktit aktual, siç raporton BBC.
Mbetet interesante për t’u parë përfundimi, pasi liderët pjesëmarrës në samit kanë qëndrime të ndryshme. Kryeministri i Britanisë së Madhe, Keir Starmer, apo dhe Presidenti i Francës, Emmanuel Macron, kanë bërë thirrje për përmbajtje të shteteve dhe ulje të tensioneve. Nga ana tjetër, kryeministri i Japonisë, Shigeru Ishiba, e ka dënuar sulmin izraelit, duke e cilësuar të patolerueshëm. Por, Presidenti i Shteteve të Bashkuara të Amerikës, Donald Trump, e ka “përkrahur” veprimin e bërë prej Izraelit ndaj Iranit, teksa tanimë kërkon marrëveshje midis dy shteteve.
Diskutimet për luftën në Ukrainë
Pavarësisht ngjarjeve të reja në Lindjen e Mesme, lufta në Ukrainë sërish do të ketë një fokus të veçantë.
Më herët, Presidenti i Këshillit Evropian, Antonio Costa, është shprehur se samiti i G7-ës, do të jetë një mundësi, ashtu sikurse një hap thelbësor, për të koordinuar presionin ndaj Presidentit të Rusisë, Vladimir Putin, lidhur me fuqinë e këtij të fundit ndaj Ukrainës.
Një ndër hapat që mendohet të merret është kufiri i çmimit të naftës. Sipas Costa, një gjë e tillë është e rëndësishme jo vetëm për të ushtruar presionin e nevojshëm mbi Moskën, por dhe për konkurrencën globale.
“Nëse Vladimir Putin vazhdon të mos na dëgjojë, nëse vazhdon të mos veprojë në përputhje me përpjekjet e Shteteve të Bashkuara të Amerikës, sigurisht do të na duhet të miratojmë paketën e 18 të sanksioneve. Por, i uroj suksese përpjekjeve të Trump”, tha Costa.
Samiti i G7-ës
Samiti i radhës i G7-ës do të mbahet nga data 15, deri më 17 qershor 2025, në Kananaskis, Alberta, Kanada. Kjo e fundit ka mbajtur dhe 6 herë të tjera samitin e rëndësishëm, përkatësisht në vitet 1981, 1988, 1995, 2002, 2010 dhe 2018.
G7 përbëhet nga SHBA-të, Kanadaja, Franca, Gjermania, Italia, Japonia dhe Britania e Madhe. Të ranishme do të jenë edhe Ukraina, Meksika, Australia, Brazili, Afrika e Jugut dhe Korea e Jugut.
Temat kryesore për të cilat do diskutohen:
-Paqja dhe siguria globale
-Tregtia globale dhe tarifat
-Siguria e lëndëve kritike
-Sanksionet ndaj Rusisë
Pritet të ketë takime të shumta bilaterale mes udhëheqësve të shteteve të pranishme në samit.
