Shtetet e Bashkuara të Amerikës po përballen me një stuhi të ftohti.
Mediat e huaja raportojnë se reshjet e dëborës dhe përmbytjet kanë shkaktuar kaos në udhëtime duke detyruar mbylljen e disa aeroporteve, linjave të hekurudhave dhe rrugëve në mbarë vendin.
Më shumë se 60 milionë amerikanë janë nën “kërcënimin” e një stuhie të madhe dimërore që ka sjellë temperaturat më të ftohta në më shumë se një dekadë.
Gjendjet e jashtëzakonshme janë shpallur deri më tani në shtatë shtete, Kansas, një nga zonat më të goditura, Misuri, Kentaki, Virxhinia, Virxhinia Perëndimore, Arkansas dhe pjesë të Nju Xhersit.
Parashikuesit thonë se moti ekstrem po shkaktohet nga një vorbull polare, një zonë me ajër të ftohtë që qarkullon rreth Arktikut, duke sjellë mot të ftohtë në SHBA qendrore.
Autoritetet njoftuan se do të ketë shtyrje në fluturime, ndoshta dhe anulime.
Gjithashtu këshilluan udhëtarët që të ndjekin njoftimet lidhur me linjat e trenave.
