Partia Socialiste ka mbledhur mëngjesin e sotëm Kryesinë, ku është diskutuar në lidhje me organizimin e brendshëm të kësaj partie.
Në përfundim të mbledhjes, kreu i Grupit Parlamentar të Partisë Socialiste, Taulant Balla, ka theksuar edhe njëherë që zgjedhjet e parlamentare do të bëhen në qershor të vitit 2021, duke shuar dyshimet se mazhoranca do të pranojnë zgjedhje të parakohshme.
“Në axhendën politike do ketë një lloj ndryshimi se nuk përmbyllet në 31 dhjetor 2020 por në 30 qershor të vitit 2021 afat në të cilin planifikojmë edhe zgjedhjet e përgjithshme parlamentare, kështu që unë do bie rehat për këtë pyetje për 13 muaj”, tha Balla.
Po ashtu, Balla tha se është njohur me ecurinë e procesit të ristrukturimit total të PS për të bërë disa rregullime të cilat do të reflektohen edhe në Kodin Zgjedhor të PS. Ai theksoi se procesi ndodhet në fazën që i paraprin Kongresit që do të zgjedhë edhe Asamblenë Kombëtare ku garanton barazinë dhe balancën gjinore, midis burrave dhe grave në këtë proces.
”Jemi njohur sot me ecurinë e procesit të ristrukturimit total të PS pas disa muajsh procesi zgjedhor i cili ka filluar me zgjedhjen e drejtuesve të rinj në qelizat bazë në çdo komunitet apo edhe në çdo fshat. Jemi partia e parë që dhe në pjesën edhe më të madhe me partitë e tjera në Europë që kemi përqafuar idenë e bashkëdrejtimit mes vajzave dhe djemve, burrave dhe grave për një përfaqësim të barabartë. Jemi në fazën që paraprin kongresin. Po zhvillojmë një proces transparent për Asamblenë Kombëtare që do zgjidhet nga Kongresi. Do të garantohet barazia gjinore. PS është një parti shumë demokratike dhe ka një libër rregullash. Organizimi e ka bërë këtë parti fituese në shumë procese. Kemi synuar për të bërë disa rregullime që disa rregulla të jenë të reflektuara dhe të jenë edhe në Kodin Zgjedhor të PS.”– thotë Taulant Balla.
Gjithashtu, Balla foli dhe për disa nga bashkitë e vendit të cilat janë pa kryetarë pas shkarkimit për sa i takon shkeljeve të zbuluara prej tyre në ligjin e dekriminalizimit.
Kreu i Grupit Parlamentar i PS, shprehet se plotësimin e këtyre vakancave e ka në dorë Presidenti Ilir Meta, duke shtuar se ai duhet të zgjohet nga gjumi.
“Presidenti ka qenë dhe mbetet në moszbatim të detyrave kushtetuese që ka. Zoti president është vënë në dijeni nga institucionet përkatës për vakancën e krijuar, është presidenti që duhet të zgjodhet dhe të respektojë kushtetutën. Kemi marrë një sërë kandidaturash, shumë reputative dhe intelektuale që të përfaqësojnë popullun e Shkodrës. Jemi duke diskutuar, shumë shpejt do kemi një drejtues të PS që të përmbushë pritshmëritë e strukturës,”-tha Balla./ Opinion.al
