TIRANË- Ministria e Punëve të Jashtme ka pranuar se diplomacinë shqiptarë ka 9 nëpunës të cilët mbajnë dy shtetësi. MPJ nuk ka bërë publik emrat, por ka theksuar se kjo nuk ndalohet as nga ligji shqiptar dhe as nga Konventa e Vjenës për marrëdhëniet diplomatike.
Dy shtetësia është kthyer në modë në dikasterin e Ditmir Bushatit. Ministria e Jashtme ka pranuar se pranë saj shërbejnë plot 9 nëpunës që përveç pasaportës së Shqipërisë mbajnë edhe atë të një shteti tjetër.
Po kjo duket se nuk shqetëson dikasterin përgjegjës për diplomacinë shqiptare. Në shtypin e shkruar është botuar një letër-përgjigje e Sekretarit të Përgjithshëm të Ministrisë së Punëve të Jashtme, Qirjako Qirko, i cili ndërsa konfirmon prezencën e 9 nëpunësve me dy pasaporta, sqaron se kjo nuk përbën shkelje.
MPJ nuk ka preferuar të bëjë publikë emrat dhe funksionet që kanë mbajnë në Shërbimin e Jashtëm të Shqipërisë por thekson se “Konventa e Vjenës për marrëdhëniet diplomatike nuk e ndalon mbajtjen e dyshtetësisë për diplomatët”. Edhe ligji për Shërbimin e Jashtëm, i vitit 2015, thekson sekretari i Përgjithshëm i ministrit Bushati, nuk paraqet një pengesë të tillë.
Problemi i personave me dy nënshtetësi që punojnë në diplomacinë shqiptare u ngrit rreth 3 muaj më parë kur mediat e Athinës publikuan lajmin e thirrjes ushtar në Greqi të Pirro Vengut, shef i kabinetit të ministrit të Jashtëm, Ditmir Bushati.
Opozita e cilësoi këtë përveçse të turpshme, edhe një kërcënim ndaj sigurisë kombëtare, arsye për të cilat kërkoi dorëheqjen e ministrit Bushati.
Ky i fundit, kur ishte në opozitë, kishte kundërshtuar ashpër mbajtjen e dy pasaportave nga diplomatët shqiptarë por me ardhjen e të majtve në pushtet, Ligji për Shërbimin e Jashtëm u ndryshua duke mos ndaluar më mbajtjen e dy shtetësisë. /abcnews/
