Nga Reldar Dedaj
Ndërsa politika shqiptare është përfshirë në ngërçin për reformën në drejtësi, sipas LSI-së edhe vetë faktori ndërkombëtar është në mungesë koherence, duke rrezikuar reformën.
Në një komunikim me mediat, nënkryetari Petrit Vasili tha se vijat e kuqe të Brukselit po mbivendosen me vijat e kuqe të Komisionit të Venecias, duke sugjeruar që opozita t’i drejtohet vetë BE-së në Bruksel për heshtjet që janë kthyer në ngërçin e reformës.
Mirëpo, ajo që vihet re më tepër është roli i LSI-së, që luan në fushë “ngriva-shkriva”. Ndërsa Vasili jep rekomandimet se ku duhet të drejtohet opozita, ai ende nuk përcakton qartë se çfarë qëndrimi po mban vetë LSI.
Megjithatë, LSI votoi të martën draftin përfundimtar të Reformës në Drejtesi, por me sa duket, gjithçka ishte pasojë e presionit të fortë amerikan dhe europian.
Mesazhet e përcjella sot nga Petrit Vasili, personi i autorizuar për të folur politikisht për reformën në drejtësi, janë tulla në një mur të ri politik, të ngritur me urgjencë prej nevojës për “fjalëmbajtje”.
Pavarësisht kësaj, LSI ende nuk po shprehet në thelb për këtë propozim. Nuk thotë asgjë publikisht, ruhet, dhe duket se janë vendosur në vijën e kufirit, as po dhe as jo. Pavarësisht se koha ja kërkon ta thotë troç, është pro apo kundër formulës së ndërtimit të institucioneve të reja të drejtësisë dhe “vetingut” me pjesëmarrjen e partive. Publikisht.
BE dhe SHBA e ka ligjëruar vijën e kuqe mbi këtë propozim.
Tani përballë janë PD, PS dhe LSI. Nëse këto dy të parat janë shumë të qarta për qëndrimet e tyre, ajo që duket ende e paqartë është qëndrimi i LSI-së.
Pyetja është ku do pozicionohet në fushë Ilir Meta… deri atëherë, a mund të mjaftojë thejsht një shkelje syri?
