Arjan Çani në emisionin “Zonë e Lirë” të premten në darkë i ka treguar ish-ministrit të Brendshëm një video të vitit 2012 kur kishte “parashikuar” se Saimir Tahiri do ta “hante” nga Edi Rama, në mënyrë të ngjashme si Qemal Stafa kur e “hëngri” nga Enver Hoxha.
“16 nëntor 2012: E ha Saimiri, historia me Enver Hoxhën dhe Qemal Stafën përsëritet”, ishte parashikimi i thënë prej Çanit.
“Ti thua se e hëngri nga Enveri, por unë i qëndroj rastit zyrtar. Qemali nuk e paska ditur, unë të paktën e di”, u shpreh Tahiri duke hedhur poshtë që kryeministri, me të cilin “janë rritur në një diell”, mund t’i bëjë diçka të tillë.
Më herët, Tahiri foli përballë Çanit edhe njëherë për shprehjet e tij të bujshme të cilat u interpretuan si mesazhe të koduara për Edi Ramën. Insistimit të Çanit për ngjashmërinë e këtyre shprehjeve Tahiri i ka sqaruar kështu:
“E kam përdorur për të shprehur më mirë veten time. Të shprehem më mirë në raport me atë që dua të them. Këto nuk kanë lidhje me shantazhin, dhe nuk kam pse ta bëj. Nuk ka lidhje me zgjedhjet e shprehjes së atij. Më keni kthyer 15 vite përpara, është e pamundur për mua ta mbaja mend. E kuptova më vonë që ishte pak a shumë e njëjta gjë. Është e parëndësishme”, tha ai
Ng ana tjetër deklaratës thumbuese të Ramës dje në emisionin “True Story” ku tha se Tahiri është rritur nën hijen e tij, Tahiri e ka komentuar kështu:
“Ajo është interpretuar jashtë kontekstit, unë kam punuar me të. Por unë nuk do e përdorja si shprehje, ai e përdori. Kemi punuar bashkë. Të dy jemi rritur në të njëjtin diell. “/Opinion.al
