Shqipëria vazhdon të digjet. Zjarri i rënë një ditë më parë në vendin e quajtur Kongrazhd, në afërsi të Burrelit ka marrë përmasa të frikshme.
Me gjithë ndërhyrjen e bërë nga forcat e shërbimit zjarrfikës të Bashkisë Mat, të shërbimit pyjor, zjarrfikëses së Bashkisë Klos dhe forcave të ushtrisë nuk është arritur të neutralizohet zjarri.
Vatra është ende aktive dhe vijon të përhapet me shpejtësi për shkak të erës së fortë. Mësohet se sipërfaqja përshkuar nga flakët ka shkuar në 60 hektarë.
Drejtori i Politikave Ekonomike, Bujqësisë dhe menaxhimit të pyjeve në Bashkinë Mat, Vebi Stana, kërkon ndihmën e ministrisë së mbrojtjes për të ndërhyrë nga ajri.
5 ditë më parë, kreu i Emergjencave Civile tha se 22 ditë të muajit mars janë djegur 167 hektarë sipërfaqe me kullota, pemëtari dhe pyje, të konsideruara si zona të mbrojtura duke sjellë pasoja shumë të mëdha si në ekonomi ashtu edhe në mjedis.
“Kjo situatë është e qëllimshme”, tha Haki Çako në një konferencë për mediat, që sipas tij të gjitha vatrat e zjarrit janë ndezur nga dora e njeriut./Opinion.al
