Uebfaqja e njohur britanike, “DigitalSpy” ka përzgjedhur këngëtaren shqiptare Dua Lipa ndër yjet më premtuese për vitin e ardhshëm.
Kjo uebfaqe thotë se Justin Bieber ishte ylli i vitit së bashku me Adelen dhe Madonnan. Kjo faqe në vitin 2016 pret që talentet e reja të dalin në skenë dhe të bëhen artistët kryesorë të vitit.
Në mesin e dhjetë artistëve më premtues të vitit, kjo faqe ka përfshirë edhe këngëtaren e re Dua Lipa.
“20-vjeçarja Dua Lipa ishte përjashtuar nga kori i shkollës sepse nuk mund të arrinte notat e larta. Fatmirësisht, këngëtarja e lindur në Kosovë ktheu gjërat në të mirë të saj. Pasi u kthye në shtëpi nga puna e saj në një klub nate në orën 4 pas mesnate ajo shkoi në një studio pak orë më vonë, dhe zëri saj u dëgjua. Tani ajo ka nënshkruar me menaxherin e njëjtë si të Lana Del Reyit. Ajo është duke u bërë gati për albumin e saj të parë në vitin e ardhshëm”, është përshkrimi i faqes për këngëtaren.
“Dua që njerëzit të shohin një pjesë timen”, ka thënë ajo për këtë faqe. “Dua që të gjithë të dinë se nuk janë vetëm dhe se të gjithë kemi kaluar në vështirësitë e njëjta”.
Në listën e dhjetë artistëve më premtues të vitit janë:
Frances; Honne; Mura Masa; Alessia Cara; Who is Fancy
Dua Lipa; Jack Garrat; Nimmo; SG Lewis; Izzy Bizu
