Përfaqësuesi i Lartë i BE-së për Politikë të Jashtme dhe Siguri, Josep Borrell, tha se inkurajon Kosovën dhe Serbinë që të zhvillojnë një dialog në frymën e kompromisit dhe pragmatizmit.
Komentet ai i bëri para fillimit të takimit ndërmjet kryeministrit të Kosovës, Avdullah Hoti, dhe presidentit të Serbisë, Aleksandar Vuçiç, në kuadër të dialogut të ndërmjetësuar nga Bashkimi Evropian.
“Jam shumë i lumtur të ju adresohem pas vetëm katër ditëve pas takimit të parë të lartë të së dielës në dialogun Prishtinë-Beograd. Takimi i së dielës ishte i pari pas 20 muajsh – një kohe të gjatë. Unë jam shumë i lumtur të shoh që BE ka marrë drejtimin e këtij procesi”, është shprehur Borrell.
“Kryeministri i Kosovës dhe Presidenti i Serbisë do të takohen sot për herë të parë fizikisht dhe për herën e dytë brenda një jave ku treguan angazhimin për dialogun e lehtësuar nga BE. Për këtë duhet përpjekje e madhe edhe e imja. Sot pres diskutime konstruktive në elementin e parë të temave që do të kontribuojnë në arritjen e marrëveshjes për normalizim të marrëdhënieve. Inkurajoj të dy palët që t’u qasen bisedimeve me frymën e kompromisit dhe pragmatizmit për të ardhmen evropiane të popullit të Kosovës dhe Serbisë”, shtoi ai.
Dialogu Kosovë-Serbi i ndërmjetësuar nga Bashkimi Evropian, do të vazhdojë sot pas më shumë se dy vjetësh, në Bruksel me takimin ndërmjet kryeministrit të Kosovës, Avdullah Hoti dhe presidentit të Serbisë, Aleksandar Vuçiç.
Takimi mbahet në selinë e Bashkimit Evropian me ndërmjetësimin e shefit të politikës së jashtme të Bashkimit Evropian, Josep Borrell, dhe përfaqësuesit të posaçëm të BE-së për dialogun, Mirosllav Lajçak.
Në fakt, dialogu virtualisht rifilloi më 12 korrik, ku palët biseduan përmes një video- konference, por takimi i sotëm paraqet bisedimet e para të drejtpërdrejta pas 20 muajsh.
Ky, gjithashtu, është takimi i parë në të cilin nuk do të marrë pjesë presidenti i Kosovës Hashim Thaçi. /Opinion.al
