Janë vetëdorëzuar, pas tre muajsh, në Polici dy motrat Mariela dhe Antonela Berisha, të cilat ishin shpallur në kërkim pasi dhunuan blogeren Klea Prenga.
Policia e Tiranës, përmes një njoftimi zyrtarë, bëri me dije se dy shtetaset janë vetëdorëzuar mbrëmjen e sotme, rreth orës 19:00.
Dy motrat Berisha akuzohen nga forcat blu për “plagosje të rëndë me dashje, kryer në bashkëpunim”.
Policia ka prangosur Mariela Berishën, pasi gjykata kishte vendosur për të masën e sigurisë “arrest me burg”, ndërsa masën “arrest shtëpie” për motrën tjetër, Antonelën.
Njoftimi i policisë:
Tiranë
Në vijim të njoftimit të dhënë më datë 09.08.2024, ku në një lokal te Kodra e Diellit, shtetaset A. B. dhe M. B. (motra) kanë goditur me shishe qelqi në fytyrë shtetasen K. P., ju njoftojmë se:
Sot më datë 16.10.2024, rreth orës 19:00, këto dy shtetase janë vetëdorëzuar në Drejtorinë Vendore të Policisë Tiranë.
Në vijim të veprimeve u bë ekzekutimi i vendimit penal të Prokurorisë pranë Gjykatës së Shkallës së Parë të Juridiksionit të Përgjithshëm Tiranë e cila ka caktuar masën e sigurimit personal “Arrest në burg”, në mungesë, ndaj shtetases M. B., dhe masën e sigurimit “Detyrimi për tu paraqitur në Policinë Gjyqësore” ndaj shtetases A. B.
Materialet i kaluan Prokurorisë.
