Dhuna në shkolla, 20% e fëmijëve dhunohen fizikisht

Një punonjëse e shtëpisë së fëmijës që dhunon fëmijën jetim, një mësues që qëllon me thupër mbi nxënësin, edhe pse jemi në shekullin XXI. Nuk janë episode filmash, por skena reale, të filmuara në shkollat dhe institucionet tona, që kulmuan vetëm disa ditë më parë në jetimoren e Shkodrës, pas akuzave për abuzim seksual me disa fëmijë të shtëpisë së fëmijës. Aktualisht dhuna ndaj fëmijëve në shkollat e vendit tonë nuk është më një ccështje që kalon pa u vënë re. Rritja e ndërgjegjësimit, teknologjia dhe mundësia e regjistrimit të videove bëjnë të mundur identifikimin e rasteve, ndërsa mediat online ndihmojnë në raportimin e tyre gjithmonë e më shumë.
Nga një studim bazë i vitit 2015 nga Ministria e Arsimit dhe Sportit “Dhuna ndaj fëmijëve në shkolla në Shqipëri” pasqyrohen të dhëna për tri forma të dhunës fizike dhe psikologjike të ushtruara nga mësuesit tek nxënësit në ambientet e shkollës. Gjetjet kryesore të studimit treguan se 41% e nxënësve shprehen se kanë përjetuar të bërtiturën si formën më të lartë të dhunës psikologjike; 22% e nxënësve kanë raportuar dhunën e ushtruar me anë të kërcënimit; 16 % e nxënësve kanë raportuar praktikat e epiteteve fyese. Ndërsa përsa i përket formave të dhunës fizike gjetjet tregojnë se 12% e nxënësve kanë përjetuar të goditurën me dorë ose me objekte të ndryshme; 8% e nxënësve kanë përjetuar shkuljen e veshit dhe pickimit. Në këtë kontekst, vazhdimi i një programi që synon parandalimin e ccdo forme të dhunës fizike dhe psikologjike ndaj fëmijës, lindi si një domosdoshmëri që do të ndikojë në një arsim më cilësor, por edhe në një shoqëri më të mirë.
Programi COMBI adreson dhunën fizike, në tre forma – goditje me dorë apo objekt tjetër,  shkulje veshi , pickim si dhe, dhunën psikologjike, në tre forma: bërtitje , kërcënim , përdorim epitetesh fyese – nofka. Në vështrimin e përgjthshëm të situatës në Shqipëri, problemi i dhunës ndaj fëmijëve vazhdon të jetë i fshehur, pavarësisht rritjes së rasteve të identifikuara, dhe nuk jepen të dhëna të sakta të cilat na japin një pasqyrë të qartë të realitetit.
COMBI “Komunikim për Ndryshimin e Sjelljes” është programi i Ministrisë së Arsimit dhe Sportit në partneritet me Ministrinë e Mirëqenies Sociale dhe Rinisë, Agjencinë Shetërore për Mbrojtjen e të Drejtave të Fëmijëve, UNICEF dhe Qendra “Fëmijët Sot”, në një përpjekje të përbashkët institucionale për parandalimin e dhunës ndaj fëmijëve në vend. Ky program po ofron një kontribut të rëndësishëm mbi avancimin dhe mbrojtjen e të drejtave të fëmijëve duke promovuar mënyra të reja të disiplinës në sisitemin arsimor 9 vjeçar publik e jo publik si dhe në institucionet e përkujdesjes shoqërore në vend. I gjithë formati dhe modeli i prezantimit të Mënyrave të Reja të Disiplinës vjen falë një eksperience 4 vjeçare të provuar dhe të testuar si të suksesshme në sistemin arsimor shqiptar. Praktika e Mënyrave të Reja të Disiplinës po angazhon të gjitha palët në institucionet arsimore, drejtues shkollash, mësues, psikologë, prindër si edhe vetë fëmijët për të patur një shkollë sa më miqësiore dhe pa dhunë. Filozofia dhe zbatueshmëria e këtij programi vë theksin mbi rëndësinë e zbatimit të ligjit dhe përforcimin e shërbimit psiko-social në adresimin e dhunës ndaj fëmijëve në shkolla.
Programi COMBI sjell një përmirësim në raportet mësues – nxënës; por edhe prind – fëmijë në funksion të trajtimit të konfliktit në mënyrë paqësore dhe pa dhunë. Trajnimet, takimet, bisedat dhe informacionet e shumta rreth e Mënyrave të Reja të Disiplinës po bëjnë hapa ndryshimi tek armata e mësuesve në konceptim përsa i përket komunikimit me nxënësin në klasë, disiplinimit të tyre si dhe zëvendësimit të mënyrave të vjetra të disiplinës me mënyrat e reja të disiplinës . Ky program ka nxitur dhe motivuar jo vetëm mësuesit, por edhe prindërit, fëmijët në promovimin e menyrave te reja në shkolla nëpërmjet veprimtarive si aktivitete, takimeve, fushatave , ekspozitave, etj., me synimin reduktimin dhe eleminimin e dhunës ndaj fëmijëve.