Prokuroria e Tiranës ka urdhëruar riekspertimin mjeko-ligjor për kushërinjtë Bilbil e Jashar Maja të cilët u dhunuan barbarisht nga anëtarë të familjes Rraja.
Ngjarja ndodhi disa javë më parë për shkak se Majat u ankuan në polici se gurorja që është në pronësi të Përparim Rrajës, vëllait të ish-deputetit socialist, Rrahman Rraja po iu dëmtonte banesat.
Sipas gazetares Klodiana Lala është urdhëruar kryerja e riekspertimit me 3 mjekë.
Kujtojmë se dy ditë më parë u publikua lajmi se Prokuroria e Tiranës ndryshoi akuzën për anëtarët e fisit Rraja.
Ndryshe nga nisja e hetimit për “plagosje të rëndë me dashje, në bashkëpunim” pas publikimit të dhunës me shkopa bejsbolli prokuroria vlerësoi që hetimi duhet të vijojë për akuzën e “plagosjes së lehtë me dashje”.
Pritet të shohim se si do të vijë hetimi pas riekspertimit./Opinion.al
