Prokuroria e Tiranës ka ndryshuar akuzën për anëtarët e fisit Rraja pas ngjarjes së rëndë që mori vëmendjen mediatike disa javë më parë, kur anëtarët e fisit Rraja dhunuan barbarisht Bilbil e Jashar Majën.
Ngjarja ndodhi për shkak se Majat u ankuan në polici se gurorja që është në pronësi të Përparim Rrajës, vëllait të ish-deputetit socialist, Rrahman Rraja po iu dëmtonte banesat.
Sipas Klan News, ndryshe nga nisja e hetimit për “plagosje të rëndë me dashje, në bashkëpunim” pas publikimit të dhunës me shkopa bejsbolli prokuroria ka vlerësuar që hetimi duhet të vijojë për akuzën e “plagosjes së lehtë me dashje”.
Ndryshimi i veprës penale ka ardhur pas administrimit të akt-ekspertimeve mjeko-ligjore ndaj të dëmtuarve.
Përveç lehtësimit të pozitës penale, akuza e re kërkon ankim nga të dëmtuarit për vijimin e hetimit.
