Policia ka dhënë informacion zyrtar lidhur me arrestimin e edukatores edukatoren Majlinda Dehima, për veprën penale “keqtrajtim i të miturit”. 48-vjeçarja dhunoi barbarisht një 3-vjeçare në kopshtin privat duke i thyer këmbën.
Dehima ishte pjesë e rastit që u bë publik, ku përmes kamerave nga një kopësht privat u pa se keqtrajtonte një të mitur.
Pas këtij rasti, Policia ka njoftuar se ka nisur kontrollet edhe në institucionet e tjera private.
“Me qëllim rritjen e parametrave të sigurisë në çerdhe, kopështe e shkolla private, Policia e Shtetit ka nisur kontrollet në terren për të verifikuar ligjshmërinë e ushtrimit të aktivitetit nga operatorët ekonomik privat”, shkruhet në njoftim.
Njoftimi i Policisë:
Në vazhdim të veprimeve të thelluara hetimore në lidhje me rastin e keqtrajtimit të një 3-vjeçareje në një kopsht privat, Specialistët për Hetimin e Krimit në Komisariatin e Policisë Nr. 1 Tiranë, ekzekutuan urdhrin e Prokurorit për masën e sigurisë “Arrest në burg”, dhënë nga Gjykata e Shkallës së Parë e Juridiksionit të Përgjithshëm Tiranë, për shtetasen Majlinda Dehima, 48 vjeçe, për veprën penale “Keqtrajtimi i të miturit”.
Kjo shtetase dyshohet se ka keqtrajtuar një të mitur, në një kopësht privat, ku punonte si edukatore.
Ndërkohë me qëllim rritjen e parametrave të sigurisë në çerdhe, kopështe e shkolla private, Policia e Shtetit ka nisur kontrollet në terren për të verifikuar ligjshmërinë e ushtrimit të aktivitetit nga operatorët ekonomik privat.
Policia e Shtetit fton prindërit, mediat e qytetarët që të denoncojnë çdo rast të abuzimit e keqtrajtimit të fëmijëve në kopështe, çerdhe e shkolla, duke ju garantuar për reagim të shpejtë e profesional.
