Gjyqtari Eldorjan Hamiti ka folur në një intervistë për “Panorama Sport” pas dhunës së ditës së djeshme, gjatë ndeshjes Kamza-Laçi. Ai u dhunua nga tifozë dhe drejtues të Kamzës, por thotë se nuk ka asnjë peng në ndërgjegje, pasi penalltia ishte e pastër, madje ia ka pranuar edhe vetë portieri. Por ndërkaq thotë për “Panorama Sport” se në atë fushë dje është ndierë i vrarë: fizikisht, moralisht dhe profesionalisht.
I pyetur për pretendimet e lojtarëve të Kamzës se kur u dha penalltia ishin dy topa në fushë, ai ka thënë: “E kanë gabim pra, nëse mendojnë kështu. Topin në fushë e hodhën vetë kamzalinjtë dhe ai top nuk u përfshi as në aksion dhe as në dinamikën e ndeshjes. Jo gjithnjë mund të ndërpritet ndeshja kur hidhet një subjekt i palejuar në fushë, kur ai nuk ndikon në aksion. Topi nuk ishte as afër që të ngatërronte lojtarët. Por këto janë çështje teknike. Nuk ka argument që e justifikon atë sjellje barbare. Nëse u mërzitën për një top, atëherë po ua çoj unë dhjetë topa dhuratë dhe le t’u bien gjithë ditën… Po u çoj edhe gjithë fisin që të merremi vesh siç e meritojnë ata… Më vranë more në fushë, e kupton apo jo? Më gjuajtën si mundën, sa mundën, me çfarë kishin në dorë.”
Ndërkohë, ka shtuar se dhuna shkaktoi një shqetësim të madh në familjen e tij. “Po si mund të qetësohen kur të shohin ashtu “live” në televizor. Ishte padrejtësi e madhe, ishte një maskaradë. Unë kam gruan shtatzënë dhe një djalë të vogël 5 vjeç. E kuptoni ju, çfarë kanë përjetuar ata sot (dje) së bashku me pjesëtarët e tjerë të familjes?”, është shprehur Eldorjan Hamiti./Opinion.al
