Ministria e Shëndetësisë dhe Mbrojtjes Sociale ka bërë me dije se pranë Spitalit Universitar të Traumës janë paraqitur 13 persona të plagosur në protestë. Prej tyre, 10 janë punonjës të policisë me plagë dhe dëmtime të shkallëve të ndryshme, të shkaktuara nga goditjet prej lëndëve piroteknike.
Po prej lëndëve piroteknike, kanë mbërritur në urgjencë dhe kanë marrë menjëherë ndihmën e parë mjekësore edhe 2 qytetarë në spitalin e Traumës, pjesëmarrës në protestë. Ndërsa 1 protestues po merr trajtimin e duhur mjekësor në urgjencën e Qendrës Spitalore Universitare “Nënë Tereza”.
Në spital për të vizituar efektivët e plagosur ka qenë dhe ministri i Brendshëm, Sandër Lleshaj i shoqëruar nga drejtori i Policisë së Shtetit. Por teksa zoti Lleshaj po bëhej gati për një deklaratë për mediat aty ka qenë dhe ish-deputeti demokrat Bardh Spahia si dhe zyrtarë të tjerë të PD-së.
Truprojat e ministrit kanë larguar ish deputetin, ndërsa nuk kanë munguar përplasjet në distancë.
Sandër Lleshaj: Ik ore shiko bëj punët e tua… Ik andej!
Bardh Spahia: Puna ime është kjo. Ju po i trajtoni shqiptarët si kriminelë
Nga pas dyshoheshin brohoritjet “Rama ik”.
“I bëj të qartë Bashës, i cili ka llogari të errëta, personi që ka vrarë 4 protestues, dhjetëra të plagosur dhe sot prodhon 10 policë të plagosur dhe 3 qytetarë, dua ti them që dhuna nuk është rruga. I bëj thirrje qytetarëve të kuptojnë qartë se dhunë nuk është opsion dhe të distancohet nga ky grup. Qytetarët të gjithë janë plagosur me mjete piroteknike”, theksoi më tej Lleshaj. / Opinion.al
