Ministrja e Mbrojtjes Olta Xhacka është duke raportuar në komisionin e Sigurisë në Kuvend, lidhur me çështjen e detit dhe negociatat me Greqinë. Ajo ka marrë në mbrojtje negociatorin e anatemuar nga opozita, Artur Mecollari. “Kapiten Meçollari ka dhënë kontributin dhe ka ofruar konsulencën e tij për disa Ministra të Mbrojtjes dhe të Jashtëm”.
Xhaçka vijoi: “Meçollari nuk pranoi të firmoste për heqjen e disa bazave detare nga plani i përhapjes dhe nuk pranoi t’ua jepte bazat detare, miqve dhe familjarëve të doktorit Kryeministër”, tha ajo, duke shtuar se sulmi ndaj Meçollarit ndodhi kur shtypi shkruante për mega-aferat me bazën e Bisht Pallës dhe për shitblerjen e pronave në Porto Romano mes familjarëve të Berishës me Damir Fazlliç.
“Sulmi i stisur ndaj Meçollarit i kushtoi shtrenjtë dhe vazhdon ta përndjekë edhe sot”, tha Ministrja. Por sipas saj, “sulmi ndaj Meçollarit është hakmarrje personale. Nuk kishte të bënte me agjenturat në kurriz të sigurisë kombëtare.”
Xhaçka tha se në vitin 2012, Kepi i Palit u degradua qëllimisht për ta shndërruar në një burim përfitimi për persona privatë. “Forcës Detare iu kërkua zyrtarisht heqja nga Plani i Përhapjes së Bazës Detare të Kepit të Palit, por Meçollari dhe 15 drejtuesit e Forcës Detare nuk iu bindën urdhrave politike”.
/Opinion.al
