Drejtori i Departamentit Amerikan të Shtetit për Evropën Jugore dhe Qendrore, David Kostelancik ka qëndruar për më shumë se 60 minuta në një takim me kryetarin e PD-së, Lulzim Basha. Takimi me Bashën, ishte i dyti në axhendën e zyrtarit të DASH.
Kryeopozitari Lulzim Basha me pas reagoi përmes një postimi në Twitter, ndërsa tregoi se çfarë ishte diskutuar.
“Diskutim shumë i hapur dhe konstruktiv me David Kostelancik- un, Drejtorin e ri të Zyrës së Evropës Qendrore Jugore në State Department. Përqendruar në ndalimin e mosndëshkimit të politikanëve dhe rikthimin e sundimit të ligjit; dhënies fund të korrupsionit dhe forcimin e partneritetit strategjik të Shqipërisë me SH.B.A”, shkruan Basha.
Gjatë takimit me kryetarin e Kuvendit, Gramoz Ruci, zyrtari amerikan ka theksuar se “është përgjegjësi e qeverisë që dora e shtrirë e për opozitën duhet të mundësojë tërheqjen e saj në realizimin e reformës zgjedhore”.
Gjithashtu diplomati amerikan vuri në dukje se realizimi i reformës duhet të ndodh brenda vitit pasi do të mundësonte një presidencë shqiptare të suksesshme të OSBE-së në vitin 2020.
Bie në sy që pjesë e axhendës së diplomatit amerikan nuk është Presidenti i Republikës, Ilir Meta. / Opinion.al
