Policia e Tiranës ka dhënë informacione paraprake në lidhje me të shtënat me armë zjarri në zonën e Institutit.
Konkretisht sipas bluve në kryeqytet, “rreth orës 11:10, në Institut, dyshohet se gjatë një konflikti për motive të dobëta është qëlluar me armë zjarri në ajër”.
“Shërbimet e Policisë kanë shkuar menjëherë në vendngjarje dhe kanë shoqëruar për veprime të mëtejshme shtetasin Y. C, i dyshuar i përfshirë në konflikt. Gjatë kontrollit fizik këtij shtetasi i është gjetur një armë zjarri pistoletë. Aktualisht, nuk ka të dhëna për persona të dëmtuar/lënduar”, thuhet në njoftimin e policisë.
Po punohet për identifikimin e kapjen e shtetasve të tjerë të përfshirë në konflikt dhe dokumentimin e plotë të ngjarjes.
“Në përfundim të hetimeve do të jepet një njoftim më i plotë për rastin”, konfirmon policia.
