I dënuar me 10 vjet burg në Itali për trafik ndërkombëtar droge, arrestohet biznesmeni nga Elbasani, Edmond Stafa. Pronari i hotelit “Skampini” në këtë qytet mësohet se është vëllai i ish-deputetit të Partisë Socialiste, aktualisht kryetar i Këshillit të Qarkut të Elbasanit, Bukurosh Stafa, shkruan “Panorama”.
Burime nga Policia bënë të ditur se Edmond Stafa është arrestuar për llogari të drejtësisë italiane, pasi rezulton i dënuar për trafik droge.
Mësohet se biznesmeni është prangosur nga sektori për Narkotikët në Policinë e Elbasanit mbrëmjen e së enjtes, ndërsa ai ndodhej në ambientet e hotelit të tij në qendër të qytetit. Babai i tre fëmijëve, sipas burime zyrtare nga Policia, është ndaluar me urdhër të gjykatës së Bergamos në Itali, e cila e ka dënuar 52-vjeçarin me 10 vjet burg për veprën penale trafik ndërkombëtar të drogës.
Policia e Elbasanit konfirmon zyrtarisht se ndalimi i biznesmenit ka ndodhur në orët e vona të natës së të enjtes në ambientet e hotel “Skampini”, në pronësi të tij, me qëllim ekstradimin e tij drejt shtetit italian. Dyshohet se biznesmeni ka pasur një urdhër arresti gjatë viteve të tranzicionit 1990-2000, ku rezulton se edhe është dënuar nga gjykata e Bergamos, qytet në Itali, ku ka qenë rezident asokohe. Hoteli dhe restoranti në pronësi të Stafës ndodhet në ambientet e brendshme të kalasë së qytetit, ambient të cilin biznesmeni rezulton se e marrë me koncesion për 99 vjet në periudhën kur Kryeministër ishte Fatos Nano dhe vëllai i tij ishte deputet i PSsë për Elbasanin.
Vetëm pak ditë më parë vetë Kryeministri organizoi një takim me gratë socialiste pikërisht në ambientet e këtij restoranti, ku i pranishëm ishte edhe ishdeputeti Bukurosh Stafa, i cili aktualisht është kryetar i Këshillit të Qarkut të Elbasanit. Pavarësisht angazhimit të vëllait të tij, Edmond Stafa ka preferuar që t’i rrijë larg politikës dhe të merret me administrimin e restorantit.
Sa i përket arrestimit, duket se ndalimi i tij ka qenë i befasishëm, pasi burime konfidenciale bëjnë të ditur se në momentin e ndalimit ai ka qenë në ambientet e lokalit të tij dhe ka qenë i papërgatitur për atë që ka ndodhur më pas. Siç mësohet, në momentin e arrestimit ai është njohur me faktin se ndaj tij kishte një venim të formës së prerë në Itali, prandaj ai nuk ka bërë asnjë rezistencë. Prej mbrëmjes së të enjtes, Edmond Stafa ndodhet në ambientet e Burgut 312 në Tiranë, ndërsa kanë nisur procedurat për ekstradimin e tij për në Itali. I ndaluari, vëllai i ishdeputetit të PS Biznesmeni i arrestuar është vëllai i ishdeputetit të Partisë Socialiste për Elbasanin në legjislaturën e viteve 20052009, Bukurosh Stafa.
Ai u përjashtua nga Grupi Parlamentar i PSsë pasi votoi pro zgjedhjes së Bamir Topit si President. Madje, në atë periudhë kur kryetar i Grupit të PS-së ishte Ben Blushi, i cili pas zgjedhjes së Topit President dha dorëheqjen nga ky pozicion, pati akuza të forta ndaj deputetëve socialistë që votuan pro. Ata u cilësuan si mbështetës të ishkryeministrit Fatos Nano dhe madje pati edhe akuza për shitjen e votës. I njohur si person i afërt me Fatos Nanon, pasi ishte pikërisht ky i fundit që e futi në politikë, Stafa u afrua sërish me PS-në pas disa vitesh nga përjashtimi. Në shtator të vitit 2015, ai u emërua kryetar i Qarkut të Elbasanit, detyrë që vazhdon ta mbajë edhe sot. / Panorama
