Detaje të tjera dalin në dritë nga hetimi për grupin kriminal të “të fortit” të “Myslym Shyrit”, Gjergj Cukali.
Ky i fundit u arrestua nga operacioni “Tangent” dhe u zbulua se ishte furnitori kryesor i disa grupeve që shpërndanin kokainë në kryeqytet.
Por nuk mbaron me kaq. Cukali kishte grumbulluar aq kapital me para droge, saqë kishte nisur të jepte edhe fajde, si edhe në shumë raste jepte kokainë pa para, por në këmbim mbante peng mjete luksoze.
Njerëz të ndryshëm shkonin se Cukali për të marrë kokainë pa para dhe linin te ai makina luksoze si garant për kthimin borxhit.
Këtë fakt e konfirmojnë burime nga Policia për “Panorama Online”. Gjatë operacionit “Tangent” janë zbuluar edhe disa mjete që nuk i përkasin Cukalit, por shtetasve të tjerë.
Po kështu, kishte edhe përdorues kokaine që linin peng automjetet e tyre, kur s’kishin para të blinin kokainë. Ndaj edhe e arrestuara Vjollca Gjoka mbante një listë të borxhlinjve të drogës.
