Një grua është vrarë paraditen e sotme në qytetin e Lezhës.
Viktima është identifikuar si Etleva Ndoka, 28 vjeç, pronare e një parukerie në këtë qytet.
Ngjarja ndodhi në biznesin e saj rreth orës 11:00 kur autori Alfred Nikolli hyri brenda me pistoletë në dorë dhe qëlloi mbi të dy herë.
28–vjeçarja, nënë e një fëmije është transportuar menjëherë drejt spitalit të Lezhës, por nuk ka mundur t’u mbijetojë plagëve të marra dhe ka ndërruar jetë.
Pas disa orë hetimesh, agjentët e drejtorisë lokale të policisë kanë bërë të mundur lokalizimin dhe më pas prangosjen e të dyshuarit, në fshatin Kallmet.
Burime policore lokale bëjnë të ditur se, fillimisht shtetasi Alfred Nikolli i ka vënë re agjentët që po e mbikëqyrnin dhe ka braktisur automjetin në të cilin ndodhej për t’u larguar me vrap.
Por ai është rrethuar dhe është vënë menjëherë në pranga. Burimet shtojnë se materialet hetimore në ngarkim të 31-vjeçarit i kanë kaluar tashmë prokurorisë së rrethit, e cila ka ngritur akuzën e “vrasjes me paramendim”.
Ndërkohë, një shtetas tjetër me inicialet V.N është shpallur në kërkim nga blutë e Lezhës nën akuzën e mbështetjes së autorit të krimit.
Grupi hetimor ka siguruar si provë deponimet nga dëshmitarë okulare.
Vrasja është regjistruar edhe nga disa kamera te sigurisë së parukerisë.
Blutë dhe prokuroria e Lezhës dyshojnë se kjo ngjarje është krim pasioni.
Sipas hetuesve mes autorit dhe viktimës ka patur një lidhje intime.
Sipas TV Klan, Etleva Ndoka i ka kërkuar që të ndahen, por Alfred Nikolli nuk ka pranuar.
