Pesë ditë pas ngjarjes së rëndë në Vlorë ku mbeti i vrarë me thikë një 22 vjeçar, sherri mes familjeve dhe palëve të përfshira në konflikt vazhdon. Këtë e konfirmojnë akuzat që palët vijojnë të hedhin ndaj njëra tjetrës në intervistat e dhëna për gazetarin Enrik Mehmeti për BalkanWeb.
Një tjetër dëshmi e bërë nga krushqit e viktimës Armando Merkaj e përfshin sërish në krim Klevis Merkaj, 27 vjeçarin që u la i lirë nga Policia e Vlorës, pasi vrasjen e pranoi vëllai i tij Novrus Merkaj.
LIDHJA E KRUSHQISË
Familjet Rrapaj dhe Merkaj kane pasur një lidhje krushqie të përbashkët. Vjehrra e vëllait të Armando Rrapajt (viktimës) fajëson për krimin Klevis Merkajn, i cili është edhe burri i thjeshtrës së saj. Rajmonda Nurçe sqaron se Klevis dhe Novrus Merkaj kanë shkuar në banesën e saj për të kërkuar vëllain e viktimës (Endri Rrapaj) duke kërcënuar se do ta vrisnin. “Për të sqaruar këtë situatë dhe për te shuar debatin mes palëve unë mora në telefon Armandon, ndërsa vëllezërit Merkaj dhe nëna e tyre kanë sulmuar atë duke shkaktuar vdekjen e tij nga plaga e marrë në zemër”, thotë Rajmonda Nurçe, raporton BalkanWeb.
Ndërkohë babai i 14 vjeçares së martuar me Klevis Merkaj, Elmaz Rexhepi, burri i Rajmondës, ka kërkuar arrestimin e dhëndrit dhe marrjen në pyetje nga policia të vajzës së tij, e cila ka qenë prezente në vendin e ngjarjes.
REAGIMI
Nga ana tjetër, Klevis Merkaj, vëllai i autorit të vrasjes se 23vjeçarit Armando Rrapaj, në një intervistë së bashku me bashkëshorten e tij kanë hedhur poshtë akuzat e vjehrrit dhe bashkëshortes së tij se kishte qenë në banesën e saj për të provokuar sherrin.
Sipas tij ai ka qenë duke kaluar me bashkëshorten dhe është thirrur nga viktima dhe të afërmit e tij për sqarim por “është goditur nga një grup prej 6 vetash”.
“Në atë moment rastisi dhe mamaja ime, e cila ka ndërhyrë për të më shpëtuar por është dhunuar dhe ajo dhe aktualisht është në spitalin ushtarak në Tiranë në gjendje të rëndë”, tregon Klevis Merkaj.
Detaje tronditëse
Ai ka hedhur akuza gjithashtu dhe në drejtim të njerkës së bashkëshortes si dhe babait të saj se kanë dashur ta trafikojnë 14 vjeçaren për prostitucion në shtetin fqinj, akuza të cilat i hedh dhe vetë bashkëshortja e mitur. Sipas saj, familja e saj dhe e viktimës kanë dashur që ta ndajnë por ajo nuk do ta bënte kurrë sepse e do Klevisin. Ngjarja ku humbi jetën 22vjeçari Armando Rrapaj ndodhi të martën e 17 janarit në lagjen “Partizani” në Vlorë. Për krimin është arrestuar Novrus Merkaj. (m.k/BalkanWeb) Advertisement
