Shtetasi turk, Nejdet Cesuroglu, u gjet i vdekur ditën e sotme në një banesë në Prishtinë.
Cesuroglu ishte një nga dy personat në kërkim nga Policia shqiptare si një nga importuesit e heroinës që përpunohej në laboratorin e Hasit.
Policia kosovare nuk jep ende detaje nëse Cesuroglu është vrarë apo ka pasur një vdekje natyrale.
Ajo që e bën më misterioze vdekjen e tij, është fakti se trupi i pajetë është gjendur më 2 dhjetor 2018, ndërsa njoftimi nga Policia e Kosovës është dhënë vetëm sot.
Mediat kosovare raportojnë se aksioni policor u zhvillua më 2 dhjetor 2018 në lagjen “Bregu i Diellit”
Gjatë këtij operacioni u arrestuan në rrugën “Jakov Xoxa” katër persona, ndërsa një i pestë i identifikuar si shtetasi Nejdet Cesoroglu apo ndryshe Lavdërim Limani, u gjet i pajetë.
Gjatë kontrollit në banesë u gjetën edhe 113 kilogramë heroinë.
Sipas dokumentit të publikuar nga Prokuroria e Prishtinës, hetimet në lidhje me grupin kriminal kishin filluar që në dhjetor të vitit 2017.
Nejdet Cesuroglu ishte fotografuar në një hotel me biznesmenin Admir Hoxha, i shpallur në kërkim si ideatori i laboratorit në Has, ndërsa dy persona të tjerë kanë rënë në pranga lidhur me heroinën e kapur në laboratorin në veri të vendit.
