Një 45- vjeçar është vrarë me armë zjarri mëngjesin e kësaj të diele në zonën e ish-kënetës, në Durrës. Viktima është identifikuar si Martin Ndreca, banues në këtë zonë. Sipas policisë autori i kësaj ngjarjeje dyshohet të jetë shtetasi Ndue Zefi, 37 vjeç banues po në zonën e Ish-kënetës. Viktima dhe autori ishin miq mes tyre dhe se përpara se të ndodhte ngjarja ata kanë qenë duke konsumuar alkool së bashku në një nga lokalet e zonës.
Ata fillimisht janë konfliktuar fizikisht me njëri-tjetrin në lokal dhe fill pas këtij episodi autori Ndue Zefi është larguar për në banesën e tij ku ka marrë një armë tip kallashnikov dhe i ka zënë pritë viktimës.
Ai qëlloi mbi viktimën pesë plumba, nga të cilët vetëm njëri e kapi në shpatull dhe që rezultoi fatal për të. Kanë qenë fqinjët ata që kanë lajmëruar policinë në lidhje me ngjarjen. 37-vjeçari është shpallur në kërkim nga policia./ Opinion.al
