Të paktën 2 persona morën pjesë në vrasjen e Naim Bajrit mëngjesin e së premtes në lagjen ‘Partizani’ në Shkodër.
Burime nga grupi hetimor i thanë Tv Klan se autorët ende të paidentifikuar sapo u afruan tek kafja ku ndodhej 68-vjeçari, tregtar peshku së bashku me punëtorin e tij, njëri prej tyre ka zbritur nga makina e më pas ka hapur zjarr.
Teksa janë siguruara se kanë ekzekutuar 68-vjeçarin, atentatorët janë larguar në drejtim të zonës së Livadheve në Kiras ku kanë djegur dhe makinën tip Benz.
Itinerari i përshkruar prej tyre është fiksuar dhe nga kamerat e sigurisë në zonë, të cilat tashmë janë në duart e hetuesve.
Hakmarrja për shkak të përplasjeve të vjetra është pista ku janë përqëndruar hetuesit. Viktima Naim Bajri nuk rezulton me të shkuar kriminale, por djali i tij i vrarë në vitin 2001 dhe lidhja me fisin Bajri kanë shtyrë hetuesit të dyshojnë se vrasja lidhet me përplasjet e vjetra që ka ky grup në qytetin e Shkodrës.
Në polici për ngjarjen janë shoqëruar dhjetra persona por deri në këtë fazë ende nuk ka asnjë të dhënë me vlerë që mund të çojnë në identifikimin dhe kapjen e autorëve të vrasjes së 68-vjeçarit, Naim Bajri./Tv Klan
