Këto janë pamjet nga vendi ku u ekzekutua me armë zjarri 29-vjeçari Ermir Dedja, në lagjen nr.18 të qytetit të Durrësit.
I riu është qëlluar disa herë me armë zjarri teksa po ecte në këmbë në një rrugë dytësore të zonës.
Si pasojë e plagëve të rënda, ai ndërroi jetë spital.
Siç shihet nga pamjet, plumbat kanë prekur edhe vetratat e xhamit të një qendre shëndetësore në vendngjarje.
Ermir Dedja raportohet se ishte banor i lagjes ku ndodhi edhe krimi, ndërsa ishte i skeduar nga policia.
Viktima rezulton person me precedent të mëparshëm kriminalë në fushën e narkotikëve dhe për moskallëzim krimi. Në zonë, njihej si problematik dhe jo i shoqërueshëm.
10 vjet më parë, në 2015-ën, Dedja është vënë në pranga për shitjen e një sasie lënde narkotike tek dy shtetas nga Hasi, që do e trafikonin në Kosovë. Është arrestuar po ashtu në 2017-ën si bashkëpunëtor në një plagosje në Shijak, që asokohe raportohet se ndodhi pas një konflikti çasti për motive të dobëta.
Paraprakisht ka dy pista kryesore lidhur me atentatin, vrasje për hakmarrje ose përfshirja në trafikimin e lëndëve narkotike.
“Më datë 20.05.2025, në orën 00:50, në lagjen nr. 18 Durrës, është qëlluar me armë zjarri shtetasi E. D., 29 vjeç, i cili ka humbur jetën në spital.
Në vendngjarje kanë shkuar shërbimet e Policisë dhe po vijojnë kontrollet për kapjen e autorit/ve.
Është ngritur një grup i posaçëm hetimor dhe nën drejtimin e Prokurorisë, vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të ngjarjes, identifikimin dhe kapjen e autorit/ve”, njoftoi policia.
