Detaje të reja janë zbuluar në lidhje me arrestimin në Belgjikë të Leonard Dukës.
Policia shqiptare bëri të ditur tre ditë më parë se Leonard Duka, kreu i klanit “Duka”, u kap në një banesë private, në një provincë të Brukselit në orën 06:00 të mëngjesit të së martës së 14 shkurtit.
Sipas abc news në këtë banesë Duka fshihej prej kohësh në Belgjikë, ku bashkëjetonte me një vajzë. Në momentin e arrestimit 37-vjeçarit i është gjetur armë zjarri dhe një sasi parash.
Policia shqiptare përmes informacioneve kishte arritur që të zbulonte vendin se ku fshihej i shumëkërkuari Duka. Më pas kanë njoftuar autoritetet belge, të cilat arrestuan 37-vjeçarin.
Ndërkohë, policia belge po heton për persona të tjerë të përfshirë në klanin Duka që mund të kenë ndihmuar 37-vjeçarin të fshihej në këtë shtet.
Aktualisht, autoritetet shqiptare janë në bashkëpunim për procedurat e ekstradimit në vendin tonë.
Duka është dënuar nga Gjykata e Posaçme Kundër Korrupsionit dhe Krimit te Organizuar me masën e sigurisë “Arrest në burg”, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit luftarak”, të kryera në formën e grupit të strukturuar kriminal.
Ai akuzohet se është një ndër autorët e vrasjes së ish-policit Santiago Malko, ngjarje e ndodhur në vitin 2019 në Belgjikë./Opinion.al
