Një tjetër mbledhje komisioni dështon në Kuvend. Bëhet fjalë për komisionin hetimor të ngritur për pajisjen e përgjitmit “IMSI Catcher”, ku ishin thirrur për të dëshmuar Ministri i Brendshëm, Saimir Tahiri, Drejtori i Përgjithshëm i Policisë së Shtetit, Haki Çako si dhe kreu i SHISH, Visho Ajazi Lika. I pranishëm në komision ishte vetëm Çako.
Më herët dështoi edhe mbledhja e Komisionit të Sigurisë pasi nga debati me Flamur Nokën, Saimir Tahiri u largua nga mbledhja.
Ndërsa në mbledhjen e dytë, Noka kërkoi me insistim praninë e Tahirit, por pas debatit me deputetët e PS, këta të fundit u ngritën dhe lanë mbledhjen. Ishte Pjerin Ndreu ai që mori me vete edhe drejtorin e Policisë, Çako.
Pjesë nga debati
Noka: E kemi thirrur tre herë Tahirin. Dy herë na tha që është jashtë, ndërkohë TIMS fakton që ka qenë brenda territorit. Shkresa e fundit është dërguar sot, ndërsa ministri nuk denjoi të rrinte në Komision të Sigurise duke ikur si halabak. Të njëjtën rrugë dhe me këtë komision. Do e thërrasim me polici.
Ndreu: Kemi kërkuar përjashtimin e z.Noka nga Kuvendi, pas fyerjeve ndaj kryetarit të komisionit të Sigurisë, z.Braho dhe prandaj kjo mbledhje nuk mund të vijojë. Kërkojmë ndërprerjen e mbledhjes pasi ndjehemi të fyer…
Ndreu-Çakos: Mbledhja e pavlefshme pa kuorum, dil nga komisioni
Çako largohet nga mbledhja: Është hera e dytë që jam këtu për të njëjtën çështje. S’e quaj të arsyeshme të përsëris të njëjtat gjëra. Të bëjmë shoë mediatikisht ose në aspekte të tjera. Duke iu falenderuar për mirëkuptimin, shpreh gatishmërinë time se jam dhe do të jem në dispozicion të çdo hetimi parlamentar ose penal, përsa kohë i gjithë hetimi administrohet nga prokuroria dhe është vetëm ajo që gëzon të drejtën e nxjerrjes së elementëve të këtij hetimi. Respektoj principet e moralit profesional si drejtor Policie.
Flamur Noka: Ministri u largua si një halabak, tani e patë si drejtori të largohej nën frikë, ankth dhe panik, me urdhër politik për t’u larguar. Ky drejtor presupozohet të jetë i depolitizuar. Kjo është gjendja e mjeruar e kësaj qeverie. Arroganca tregon se është në dëshpërim të plotë, vuajnë nga mungesa e argumentit dhe me arrogancë mendojnë se do t’ia hedhin.
