Pavarësisht punës që po bën Inspektorati Shtetëror Teknik dhe Industrial për të parandaluar tregtimin e paligjshëm të gazit për rimbushjen e bombulave për përdorim familjar, ky aksion duket se ka dështuar, pasi siç konstatohet dhe nga këto foto të siguruara nga Televizioni Klan, rezulton se pikat e autogazit në karburante, edhe pse janë të bllokuara, vazhdojnë të shesin gaz.
Nga pamjet kuptohet mekanizmi që ata përdorin. Kjo pikë karburanti e ka çmontuar tubin që i është bllokuar nga Inspektoriati Shtetëror Teknik dhe Industrial dhe e ka lënë atë fiktivisht, ndërkohë që kryen furnizim me një tub tjetër, që ka pistoletën pa vulë.
Këto janë pamjet e paradites së sotme në një pikë autogazi në Tiranë. Pistoleta e bllokuar me fashetë në pjesën ballore të autogazit ndërsa nga mbrapa është një bombul 5kg e ndryshkur dhe jashtë standartit që po rimbushet me tubin e ri të rimbushjes.
Një ditë më parë Inspektoriati Shteteror Teknik deklaroi se që për 15 ditët e para të Shkurtit janë kryer 300 kontrolle dhe janë gjobitur 61 subjekte për tregtim të paligjshëm, masë kjo e cila pavarësisht sasisë së gjobave nuk po e frenon fenomenin.
