Ka dështuar takimi mes dy krerëve politik, Lulzim Bashës dhe Edi Ramës për Reformën në Drejtësi. Menjëherë pas takimit, kryeministri Rama ka mbajtur edhe një deklaratë për mediat për të bërë me dije për atë se çfarë ka ndodhur në lidhje me vijimësinë e takimit.
Kryeministri Rama tha se bëra të gjitha përpjekjet e mundshme për t’u dhënë kundërshtarëve tanë politikë mundësinë reale të kompromisit pa cënuar përmbajtjen thelbësore të kësaj reforme.
Rama theksoi ndër të tjera se me përpjekje të mundshme, nuk kam parasysh vetëm këtë orë me këtë diskutim të hapur të drejtpërdrejtë, por kam parasysh një vit e gjysmë proces.
Deklarata e Ramës nga Pallati i Kongreseve:
“Ne ishim mikëpritesit dhe ishte dëshira e miqve që unë të dilja përpara, gjë që është shumë e natyrshme që mikëpritësi ta lë mikun brenda, më vjen keq që nuk arritën ta bindim Partinë Demokratike për të votuar së bashku draftin e shkruar bashkarisht me partnerët tanë strategjik të Reformës në Drejtësi. Më vjen shumë mirë t’u them sot të gjithë shqiptarëve që i bëra të gjitha përpjekjet e mundshme, bëmë të gjitha përpjekjet e mundshme, për t’ia dhënë kundërshtarëve tanë politikë mundësinë reale të kompromisit pa cënuar përmbajtjen thelbësore të kësaj reforme.
Me përpjekje të mundshme, nuk kam parasysh vetëm këtë orë me këtë diskutim të hapur të drejtpërdrejtë, por kam parasysh një vit e gjysmë proces, drafti që kishim në tryezën e diksutimit, ishte ai i diskutuar në komisionin e posacëm të Reformës në Drejtësi, i shoqëruar me një plan ditë pas ditësh, që e ofruam me ekspertët europianë dhe amerikanë për të plotësuar afrimin mes palëve.
Ne e kishim pranuar 100 për qind këtë plan, ku përfshirë edhe shumica e cilësuar e dy të tretave që është kërkuar papushim nga Partia Demokratike, pas leximit të parë të raportit të komisionit të BE-së, për habinë e shumë kujt, PD e refuzoi këtë ofertë që e barazon shumicën me opozitën me përzgjedhjen me votë të kandidatëve për pozicione të caktuar në sistemin gjyqësor.
Unë nuk u habita, sepse nuk hyj te ata që mendoj se Partia Demokratike e do Reformën në Drejtësi. Por pikërisht sepse kam mënduar kështu që ditën e parë, kam qenë jashtëzakonisht më i detyruar si asnjëherë tjetër, dhe kam kërkuar nga të gjithë durimin më të madh, të njëjtën gjë ka bërë edhe aleati ynë.”
