TIRANE- Dështimi i shëndetësisë falas si dhe kushtet e këqija në spitalet shtetërore nuk janë vetëm fjalë… por edhe fakte. Shikoni se sa kanë shpenzuar shqiptarët në spitale private gjatë vitit 2014. Një vit pasi Qeveria e majtë erdhi në pushtet me slloganin “shëndetësi falas”
****
Sipas të dhënave nga bilancet përkatëse, pesë spitalet dhe klinikat kryesore private në vend, Spitali amerikan (Univers-Alb), Hygeia Hospital, Salus, Spitali Gjerman, Klinika Gjermane e Syrit, Spitali Europian kanë qarkulluar në total rreth 6 miliardë lekë, apo rreth 43 milionë euro gjatë vitit 2014. Ato kanë njohur një rritje prej 18 për qind në biznesin e tyre, krahasuar me vitin 2013.
Këto para që shqiptarët kanë shpenzuar për t’u kuruar në spitalet private, janë gati sa 75% e shumës që paguan taksapaguesit për sigurime shëndetësore po në vitin 2014. Sipas të dhënave nga Ministria e Financave të ardhurat nga kontributet e sigurimeve shëndetësore për 2014-n ishin rreth 8 miliardë lekë dhe pritet të arrijnë në 9.2 miliardë lekë në 2015-n. Megjithatë, shumë individë, edhe pse janë të siguruar duket se kanë preferuar komoditetin që ofrojnë sot spitalet private, pavarësisht se u ka kushtuar më shtrenjtë.
Spitali më i madh në vend është Univers Alb, me një xhiro prej gati 3.3 miliardë lekësh në 2014-n, sipas të dhënave të raportuara në bilanc, me nje rritje prej 11% me bazë vjetore. I dyti më i madh në vend është Hygeia, me një qarkullim vjetor prej 1.9 miliardë lekë dhe zgjerim 16%. Salus, në vitin e dytë të plotë të aktivitetit ka rritur me 80% të ardhurat, në rreth 375 milionë lekë. Spitali Gjerman ka rritur të ardhurat me 20% në 166 milionë lekë. Klinka Gjermane e syrit ka dyfishuar gjithashtu të ardhurat, në 90 milionë lekë.
Megjithatë, spitalet private vijojnë të dalin me humbje ende të larta. Sipas një studimi të Kosporatës Financiar Ndërkombëtare (bazuar në analizat që ajo ka bërë për kreditë e dhëna për spitalet private në vende të ndryshme të botës), investimet në spitale, me 100 deri në 200 shtretër kanë në përgjithësi një periudhë ku shpenzimet barazohen me të ardhurat (break even point) prej rreth tre vitesh. /monitor/
