Banorët në Athinë janë të shokuar nga ngjarja e rëndë e ndodhur në një bar të kryeqytetit grek, ku dy shqiptarë të moshës 41 dhe 44 vjeç, mbetën të vrarë.
Viktima janë Kreshnik Çerçizaj 41-vjeç dhe Armando Ogranja 44-vjeç, ndërkohë e plagosur ngeli edhe një vajzë 31-vjeçare, e cila ishte ulur në tavolinën ngjitur me dy viktimat.
Një dëshmitar okular u shpreh për “Protothema” se njëri nga dy shqiptarët e vdekur njihej me emrin Niko.
“Viktima ishte i njohur dhe të gjithë e njihnim se shiste lëndë narkotike. E pashë të gjakosur derisa erdhi ambulanca. Ndërkohë njerëzit po bërtisnin kur sulmuesi qëllonte. Paniku mbizotëroi dhe të gjithë vrapuan të frikësuar. Sheshi ishte plot me njerëz sepse po shikonin një ndeshje futbolli”, tha ai.
Një tjetër banor i zonës tregoi: “Dëgjova 5-6 të shtëna, në fillim mendova se ishte diçka tjetër. U trondita, zbrita poshtë, pashë policët dhe të vdekurin. Në këtë shesh bëhet tregti. Kam protestuar shumë herë sepse sheshi ynë është kthyer në strofkë paligjshmërie ”.
Dyshohet se personi që qëlloi me armë zjarri ka qenë profesionist në qitje dhe se gjithë ngjarja ka ndodhur brenda 4 sekondave.
Po ashtu dyshohet se objektivi i ekzekutimit mafioz ka qenë 41-vjeçari Kreshnik Çerçizaj, i cili është qëlluar me 5 plumba në kokë.
