Adriatik Kërçuku nga Lushnja, i cili sipas prokurorise është kërcënuar nga Emiljano Shullazi ka dëshmuar në procesin gjyqësor ndaj Shullazit dhe 4 bashkëpunëtoreve te tij. Para togave te zeza Kërçuku tha se nuk e njeh Shullazin dhe nuk është kërcënuar ndonjëherë drejtpërdrejt nga ai.
Sipas tij në vitin 2016 një person është paraqitur në biznesin e tij dhe ku është prezantuar si Emiljano Shullazi. Kërçuku tha se nuk ndodhej aty, por ka folur në telefon me të dhe nuk e ka takuar asnjëherë të pandehurin. Një muaj pas kësaj në magazinën e biznesmenit ka ndodhur një shpërthim me tritol, por që ai nuk e lidh me Shullazin.
Të njëjtin version ka mbajtur edhe Ismail Dervishaj magazinier në biznesin ku ndodhi shpërthimi. 62-vjeçari tha se nuk e njeh asnjë nga të pandehurit pavarësisht se ka qenë ai që ka pritur personin e prezantuar si Shullazi. Prokuroria kundërshtoi deshminë e tyre pasi në hetimet paraprake ata kanë deklaruar tjetër gjë. Seancën e ardhshme jane thirrur për të dëshmuar 7 dëshmitarë në lidhje me episodin e kërcënimit të rektorit të Universitetit të Tiranës Mynyr Koni.
Në datën 10 Tetor do dëshmojnë ish-ministri i Brendshëm Saimir Tahiri, Drejtori i Policisë Haki Çako, Dhori Kule, Mynyr Koni, Klodeta Dibra, Shezai Rrokaj dhe Majlinda Keta. /tv Klan
