TIRANE-Oficerët e policisë kanë marrë në pyetje edhe disa prej vajzave me të cilat Klea kalonte pjesën më të madhe të kohës. Gjatë dëshmisë së tyre, dy prej shoqeve të shkollës së 20vjeçares kanë pohuar se Klea nuk u kishte lënë përshtypje se do të arrinte në vetëflijim. “I kemi qëndruar gjithmonë pranë. Ajo komunikonte shumë me ne, për gjithçka që e shqetësonte. Nuk na ka lënë aspak që të dyshonim se do të ndodhte diçka e tillë. Ne e njihnim edhe ish-të dashurin e saj dhe me të dilnim shpeshherë për t’u takuar. Pavarësisht të gjithave, ata kishin mbetur miq”, mësohet të kenë thënë dy 20vjeçaret në Komisariatin Nr.2 në Tiranë.
Ngjarja
Mbrëmjen e së mërkurës u raportua se një vajzë është gjetur e pajetë në shesh-pushimin e shkallëve të një pallati 11 kate të lartë tek 21 dhjetori pranë parkut të autobusëve. Policia e identifikoi lehtë, pasi ajo mbante në dorë kartën e identitetit. Bëhej fjalë për 20 vjeçaren Klea Shyti.
Trupi i pajetë u dërgua në morg, prej aty u lajmëruan familjarët. Nga marrja në pyetje e familjarëve dhe të njohurve u mësua se dyshimi kryesor është ai i një vetëflijimi për dashurinë e pakthyer. Siç tregojnë ata që e kanë njohur Klea, 20 vjeç, studente e shkëlqyer e Ekonomikut, kishte qenë e lidhur me një djalë. Ata ishin ndarë pak muaj më parë, dhe ish- i dashuri i kërkonte të mbeteshin shokë dhe të takoheshin si të tillë. Fakt ky që nuk është përtypur nga Klea, ose të paktën, kështu mendohet pasi të vertetat e saj ajo i ka marrë me vete…duke lënë pas shumë dhimbje në familje. Ngjarja ka prekur mjaft edhe opinionin publik.
