Manuela Maraj ishte një prej viktimave e cila u mbyt tragjikisht në plazhin e Zvërnecit së bashku me Xhoana Canin dhe heroin nga Tetova Benjamin Ferati. Në familjet e viktimave zija ka pllakosur. Por vjehrra e Manuelës ka folur në lidhje me humbjen tragjike të nuses së djalit.
Larguar vetëm rreth 3 muaj më parë nga fshati Babicë, 27-vjeçarja jetonte së bashku me të shoqin dhe dy fëmijët e saj 9 dhe 4 vjeç në një pallat në lagjen “Pavarësia”, shkruan “Panorama”.
Mbarime Maraj, vjehrra e Manuelës dhe gjyshja e Xhoanës, nuk mundet t’i mbajë lotët për këtë tragjedi të ndodhur në familjen e saj.
Vetëm pak ditë më parë, Manuela më tha se kishte gjetur një vend shumë të mirë për plazh. Kishin shkuar në Zvërnec për plazh dhe duke eksploruar zonën kishin gjetur edhe këtë vend që paska qenë i mallkuar. Manuela më ka lënë dy fëmijë jetimë, më ka lënë djalin, burrin e saj. Edhe mbesa ka lënë një fëmijë të mitur. Kjo është një tragjedi shumë e madhe për familjen time që nuk gjej fjalë ta përshkruaj”- thote ajo.
Asaj nuk i ishin tharë ende lotët për të birin e vrarë në vitin e mbrapshtë të ’97-ës, kur një tjetër gjëmë siç e cilëson ajo goditi familjen e saj.
Në emër të familjes së saj, Mbarimja i kërkon ndjesë familjes së 24-vjeçarit nga Tetova, i cili sipas saj vdiq si hero për të shpëtuar jetën e dy vajzave.
