TIRANË- Nëna dhe shoqet e Klea Shytit, vajzës që u hodh nga kati i 11 i një pallati, 4 ditë më parë kanë dhënë dëshmitë e tyre në komisariatin nr.2 në Tiranë. “Kam qenë në dijeni për lidhjen e dashurisë që vajza ime ka pasur me një djalë. E dija që shkonin mirë dhe kishin mbetur miq. Nuk mendoja kurrë se vajza ime do të merrte vendimin t’i jepte fund jetës së saj”. Kështu ka deklaruar para oficerëve të Komisariatit Nr.2 në Tiranë, e ëma e 20vjeçares, studente në vitin e parë të Fakultetit Ekonomik.
Ngjarja e rëndë ka ndodhur mbrëmjen e së mërkurës, rreth orës 21:00. Të resë iu gjet në njërën dorë karta e identitetit, ndërsa në xhep aparati celular. Një ditë pas ngjarjes, grupi hetimor mori në pyetje familjarët e vajzës si dhe disa nga shoqet e saj më të ngushta. E mbuluar nga lotët, nëna e së ndjerës, në pamundësi për të besuar atë se çfarë ishte duke përjetuar, ka treguar në polici se me Klea ka qenë e lidhur më shumë se nënë e bijë. “Kishim shumë afrimitet me njëratjetrën. Ajo më tregonte gjithçka bënte, nuk më mbante të fshehta. Më ka treguar edhe për lidhjen që kishte pasur. Më ka thënë që kishin mbetur thjesht miq”, – është shprehur nëna e Kleas.
“Çdo gjë më duket si e pavërtetë. Nuk e besoj dot këtë që më ndodhi, gjithçka më duket bosh. Asnjëherë nuk ka pasur probleme më përpara. K. ishte vajzë e mrekullueshme. Edhe në shkollë ishte vajzë e mirë, mësonte shumë”, ka rrëfyer mes dhimbjes nëna e Kleas, e cila ka edhe një vajzë më të vogël.
