TIRANË- Një 20 vjeçare nga Mirdita ka plagosur me thikë bashkëfshatarin në pyll, pasi ky i fundit ka tentuar pa përdhunojë.
Manjola Gjonaj ndodhet nën kujdesin e bluzave të bardha, jashtë rrezikut për jetën, ndërsa ndaj saj është caktuar masa arrest me burg për plagosje me dashje.
Kur është pyetur për ngjarjen ajo ka deklaruar se thikën e mbante gjithnjë me vete pasi kur futej në pyll për punët e përditshme të fshatit sepse kishte frikë nga ndonjë sulm i mundshëm. Ngjarja ndodhi pasditen e së hënës në Kodër-Rrëshen të Mirditës. Sipas Policisë, Severjan Tusha, 24, vjeç është plagosur me armë të ftohtë, thikë, nga shtetasja Manjola Gjonaj.
Dy të rinjtë të cilët ishin nga i njëjti fshat kishin njohje me njëri-tjetrin dhe në momentin e ngjarjes janë takuar rastësisht në një zonë të pyllëzuar pranë Kodër-Rrëshenit.
Sapo ka parë vajzën e cila ishte e vetme, 24vjeçari Tusha i është afruar dhe ka tentuar të kryeje marrëdhënie seksuale me dhunë me të. Tentativa e tij për përdhunim ka çuar në përplasje fizike midis tyre.
E gjendur përballë kësaj situate, vajza e cila mbante thikë me vete e ka qëlluar disa herë në disa pjesë të ndryshme të trupit agresorin, duke i shkaktuar dëmtime të rënda.
Ndonëse i plagosur, 24vjeçari i është kundërpërgjigjur asaj duke e qëlluar disa herë me sende të forta, çka i ka shkaktuar disa dëmtime të lehta. Kanë qenë banorë të zonës që kanë dëgjuar britmat dhe thirrjet për ndihmë të saj, të cilët i kanë gjetur të rinjtë të plagosur.
24-vjeçari ishte plagosur më rëndë dhe i përgjakur ishte thuajse pa ndjenja. Ndërsa vajza kishte marrë plagë në kokë si pasojë e goditjeve me mjete rrethanore, por jashtë rrezikut për jetën.
