TIRANE- Duke folur në komisariatin nr.2 për incidentin në Kombinat, Altin Dani ka thënë se nuk kishte në plan të vrisje vëllezërit Kapo. Ai është justifikuar se në gjendje të dehur ka qëlluar në drejtim të lokalit pasi nuk i kanë anuluan skedinën.
Sipas deklarimeve të 40 vjeçarit, nuk ka pasur për qëllim të vrasë dy vëllezërit Amarildo e Evi Kapo, i pari pronar i lokalit të basteve. “Kam qenë i pirë. Nuk mbaj mend me saktësi se çfarë ka ndodhur, por nuk kam pasur si qëllim të vrisja njeri. Sherri ka nisur sepse pronari i lokalit nuk më anuloi një skedinë që e kisha humbur”. Kjo ka qenë një pjesë e dëshmisë që Altin Dani ka dhënë para grupi hetimor, disa orë pas vetëdorëzimit në polici mbrëmjen e së dielës. Dani ka shpjeguar se shkonte shpesh në lokalin në pronësi të Amarildo Kapos dhe kishte shpenzuar shumë para me skedinat që vendoste aty.
Burime nga grupi hetimor thanë se Altin Dani është pyetur edhe rreth atentatit të 5 janarit 2015, që iu bë mikut të tij, Pajtim Serjani dhe ku ai pretendohej se ishte plagosur, por edhe këtë ai e ka mohuar.
“Kam qenë me të atë natë, por mua nuk më ndodhi asgjë. Nuk është e vërtetë që jam plagosur. Këtë mund ta vërtetoni lehtësisht duke verifikuar kartelat nëpër spitale”, ka deklaruar Dani. /Gazeta Panorama/
