Ish-drejtori i Arkivit të Ministrisë së Brendshme, Kastriot Dervishi, ka publikuar një dokument që tregon se ish-gjyqtari i periudhës së komunizmit, Aranit Çelaj në vitin 1941, ka kërkuar të punësohej në administratën e pushtuesit fashist.
Me anë të një statusi në rrejtin social facebook, Dervishi thekson se Aranit Çela në vend që të merrte armët e të luftonte okupatorin që kish zaptuar vendin, bënte kërkesa për t’u përfshirë në administratën e pushtuesit.
“Kjo është kërkesa që Aranit Çela i bën Ministrisë së Drejtësisë për të marrë pjesë në konkursin e nënsekretarëve gjyqësorë. Kërkesën e ka shkruar me seriozitet maksimal, madje nuk ka harruar të shënojë as vitin e 19-të fashist”, shkruan Dervishi.
Ai ka nënvizuar se Çela nuk rezulton të jetë shpallur fitues në këtë konkurs. Sipas tij, nëse do kishte fituar, do regjistrohej menjëherë në Partinë Fashiste.
“Megjithatë, Aranit Çela ia doli të bëhej prokuror e gjykatës, pa pasur pikën e turpit të akuzojë kot më kot si “fashistë” e “tradhtarë” qindra e qindra kundërshtarë të regjimit komunist”, tregon Dervishi.
Aranit Çela ka qenë Kryetar i Gjykatës së Lartë për shumë vite në sistemin komunist, por mbi të gjitha ai ka qenë kryetar i trupës gjykuese në proceset më të rëndësishme politike.
Duke nisur nga grupet armiqësore brenda partisë dhe qeverisë e deri tek denimet politike për krime kundër shtetit, propoganda dhe agjitacioni apo edhe arratisjet jashtë vendit.
Firma e Aranit Çelës është hedhur në të gjitha dënimet me vdekje për disa dekada në shtetin shqiptar komunist.
Aranit Çela me origjinë nga Kuçi i Vlorës, ka qenë partizan në Brigadën e Pestë që operonte në zonën e Vlorës.
Shënimi i plotë:
Në vitin 1941 Aranit Çela kërkonte të punësohej në administratën e fashizmit
Në vitin 1941, Aranit Çela në vend që të merrte armët e të luftonte okupatorin që kish zaptuar vendin, bënte kërkesa për t’u përfshirë në administratën e pushtuesit. Kjo është kërkesa që Aranit Çela i bën Ministrisë së Drejtësisë për të marrë pjesë në konkursin e nënsekretarëve gjyqësorë. Kërkesën e ka shkruar me seriozitet maksimal, madje nuk ka harruar të shënojë as vitin e 19-të fashist. Sipas të dhënave të tjera, nuk rezulton që Çela të jetë shpallur fitues në këtë konkurs. Nëse do kishte fituar, do regjistrohej menjëherë në Partinë Fashiste. Megjithatë, Aranit Çela ia doli të bëhej prokuror e gjykatës, pa pasur pikën e turpit të akuzojë kot më kot si “fashistë” e “tradhtarë” qindra e qindra kundërshtarë të regjimit komunist.
