Elona Gjebrea, aktualisht deputete e PS dhe më herët zv/ministre e Brendshme mohoi sot se është marrë në pyetje nga Prokuroria e Krimeve të Rënda. Por portali exit.al raporton se “ajo ka qenë e pranishme në rrethana të dyshimta me Saimir Tahirin dhe vëllezërit Habilaj dhe pikërisht për këtë fakt është marrë në pyetje nga prokurorët”.
Burime nga Italia, të afërta me prokurorinë e Katanias, u shprehën për Exit.al se gjatë kohës që shërbente si zëvendëse e Saimir Tahirit, Gjebrea dyshohet të ketë qenë të paktën një herë në shoqërinë e vëllezërve Habilaj.
Ndërkohë, prokurorët italianë kanë konfirmuar nga pala shqiptare, se Gjebrea ka shoqëruar të paktën një herë Saimir Tahirin në një prej udhëtimeve të tij private në Greqi, udhëtim që dyshohet se është bërë në mbështetje të aktivitetit kriminal të Habilajve.
Megjithatë, nuk ka ende asnjë informacion nga prokuroria shqiptare mbi pozitën e Gjebreas në hetimet e tyre. Elona Gjebrea shërbeu si zv/ministre e Brendshme, kur dikasteri drejtohej nga Saimir Tahiri në periudhën 2013-2017. Ajo ka qenë zyrtarisht e ngarkuar me luftën kundër trafikimit dhe ka shërbyer si koordinatore kombëtare për Luftën Kundër Trafikimit të Qënieve Njerëzore.
Në zgjedhjet e vitit 2017 Elona Gjebrea kryesoi listën e kandidaturave për deputetë të Partisë Socialiste në qarkun e Tiranës, që konsiderohet moralisht si pozicioni më i rëndësishëm në listat për kandidatë të një partie. Ky promovim i Gjebreas u lidh që atë kohë me mbështetjen ndaj saj të Saimir Tahirit, i cili shërbente si kryetar i PS-së së Tiranës dhe drejtues i fushatës zgjedhore të socialistëve në qarkun e Tiranës.
