Deputeti i Lëvizjes Vetëvendosje, Mirsad Shkreta, ka rënë pre e grabitësve.
Shkreta ka denoncuar në Policinë e Kosovës për vjedhjen e 50 mijë eurove nga banesa e tij në Prishtinë.
Në orët e para të së premtes, më 24 qershor, Shkreta ka vënë re se i është vjedhura banesa dhe më pas ka njoftuar Policinë.
Mediat kosovare shkruajnë se brenda hetuesisë kanë thënë se gjatë intervistimit deputeti Shkreta ka deklaruar se paratë që dyshohet se janë vjedhur, janë mbledhur për arsyen e larjes së një borxhi.
Sipas burimit, Shkreta po ashtu u ka thënë hetuesve se ato para janë mbledhur bashkë me disa familjarë të tij.
Prokurori i çështjes, Rrahim Podvorica, i pyetur nëse Shkreta ka deklaruar se paratë kanë qenë të mbledhura edhe nga një bashkë familjar i tij, shkurtimisht ka deklaruar se “Nuk mund të jap detaje për shkak të hetimeve”.
Në raportin policor që e ka siguruar Kallxo.com, deputeti i mazhorancës ka treguar se nuk kishte qenë në banesë që nga mëngjesi i datës 23 qershor, ditë e enjte.
Ndërsa kur ka hyrë në banesë, pak pas mesnate, ka pikasur se banesa iu është vjedhur dhe se janë grabitur paratë.
Në raportin e Policisë thuhet se nuk kanë gjetur shenja se dera e banesës është hapur me forcë.
Dyshimet e Policisë janë se dera është hapur me çelës.
“Pala është intervistuar dhe dyshohet se i dyshuari ka hyrë në banesë me çelës për shkak se nuk ka dëshmi që është depërtuar me forcë”, thuhet në këtë raport të policisë.
Mediat kosovare kanë kontaktuar edhe më zëdhënësen e Prokurorisë Themelorë në Prishtinë, Laureta Ulaj.
Ajo ka thënë se me vendim të prokurorit rasti është cilësuar si “Vjedhje e rëndë”.“Ju njoftojmë se me urdhër të prokurorit kujdestar është iniciuar rast në drejtim të veprës penale ‘Vjedhja e rëndë’, si dhe në koordinim me policinë janë duke u ndërmarrë të gjitha veprimet e nevojshme.
Në anën tjetër, Shkreta më 29 mars të këtij viti ka dorëzuar raportin e deklarimit të pasurisë në Agjencinë Kundër Korrupsionit.
Mirëpo, në tabelën ku tregohet se sa para të mbajtura në institucione financiare ka deputeti Shkreta, nuk figurohen paratë që pretendohet se janë vjedhur.
