Deputeti i CDU-së dhe anëtari i Komitetit për të Drejtat e Njeriut në Bundestag, Martin Patzelt, dikur edhe ish-kryebashkiak i Frankfurtit, mendon ndryshe nga kolegu i tij, Gunther Krichbaum kur bëhet fjalë për progresin e Shqipërisë.
Në një shkrim të tijin në median prestigjoze gjermane “Focus” ai shpjegon arsyet pse kancelarja Merkel duhet të mbështesë integrimin e Shqipërisë.
Patzelt madje vlerëson edhe kryeministrin Rama dhe rolin që ai ka patur në zhvillimet e fundit në Shqipëri.
“Para takimit me kryeministrin shqiptar, Edi Rama në Berlin, Angela Merkel premtoi që do të mbështeste zgjerimin e BE-së.
Shqipëria nga ana tjetër ka bërë ndryshime rrënjësore vitet e fundit dhe ka hedhur hapa mjaft të rëndësishme në rrugën drejt integrimit në BE.
Këtë e theksoi edhe vetë Merkeli”, shkruan Patzelt, duke mos qenë në të njëjtën linjë me Krichbaum-in.
Ai madje vlerëson se Shqipëria ka patur shumë probleme të brendshme dhe të jashtme para zgjedhjes së Ramës kryeministër.
Ai vlerëson se reforma në drejtësi i hap rrugë çeljes së negociatave për integrimin në BE. “Vendi konsiderohet stabil, është anëtar në NATO dhe ka marrëdhënie mjaft të mira ekonomike me BE. Ai mbështetet edhe nga SHBA-të gjithashtu”, thotë Patzelt.
Madje, ai nuk e përmend drogën si problem, por më shumë përqendrohet te infrastruktura, administrata publike dhe shëndeti publik.
“Ka patur shumë progres me Ramën kryeministër. Shqipëria dukshëm po tregon se do të jetë një partner i besueshëm për BE-në”, shkruan Patzelt.
Po kështu, Patzelt e konsideron Shqipërinë si një vend që i respekton liritë themelore të njeriut dhe të drejtat e minoriteteve.
“Shqipëria njihet për tolerancën fetare dhe respektim të të drejtave të pakicave. Ata kanë dhënë një kontribut të madh në pritjen e refugjatëve me origjinë iraniane. Në këtë mënyrë, Shqipëria tregon se Ballkani ka shpresë të sheshojë problemet etnike”, shkruan ai.
