Artan Gaçi ka mbajtur një fjalim në parlament jashtë linjës së qeverisë së tij. Deputeti socialist do të shprehej: “Ndërsa në një anë rrihet një biznesmen, në krahun tjetër shpëtohet një kotele”. Kujtojmë se lajmi për shpëtimin e koteles nga policët u publikuar nga ministri Tahiri.
Më tej, Gaçi u ndal gjatë tek dhuna ndaj investitorit që u detyrua të linte Shqipërinë.
“Investitori që la Shqipërinë me barelë ishte një pamje e dhimbshme, ndërsa ngjarja që e detyroi të largohej për mua është një terrorizëm i pastër. Terrorizëm ndaj çdo sipërmarrësi vendas apo të huaj, terrorizëm jo vetëm ndaj të ardhmes dhe turizmit, por edhe të Shqipërisë. Prej 25 vitesh vazhdon e përsëritet e njëjta histori, biznesmenë që guxojnë, provojnë dhe pothuajse gjithmonë dështojnë. Kështu ndodhi me Kakomenë që na çoi 10 vite pas në turizëm, kështu ndodhi edhe këtë javë që na çoi edhe 10 vite të tjera pas”, tha Gaçi.
